Amérika kéngesh palatasida échilghan yighinida erkin asiya radiyosi Uyghur bölümige yuqiri baha bérildi

• Muxbirimiz jüme
  2021-06-11

10-Iyun amérika kéngesh palatasi tashqi munasiwetler komitétida échilghan birleshme tarmaq komitétlirining “Shinjangdiki wehshiylik” namliq guwahliq bérish yighinida erkin asiya radiyosi Uyghur bölümige yuqiri baha bérildi.

Mezkur guwahliq bérish yighinigha riyasetchilik qilghan kéngesh palata ezasi ed markéy erkin asiya radiyosi Uyghur bölümining xitay heqqidiki xewerliri arqiliq xitayni öz qilmishliridin tanalmas qilip qoyghanliqini bildürdi.

U mundaq dédi: “Erkin asiya radiyosi Uyghur bölümi xitayning yiraq gherbidiki milyonlighan Uyghurning wehshiylerche qolgha élin'ghanliqi we musulmanlargha qaritilghan qebih jinayetler heqqide xewer bérishte aldinqi septe turup, xitay hökümitini tutup turush lagérlirining mewjutluqini we nazaret döliti qilmishlirini inkar qilalmaydighan halgha chüshürdi”.

U yene xitay hökümitining erkin asiya radiyosi Uyghur bölümining muxbirlirini jimiqturush üchün ularning xitay ichidiki a'ile ezalirini tutqun qilghanliqi we parakendichilik salghanliqini shuningdek buning aldini élish üchün choqum heriketke ötüsh lazimliqini éytti.

U munda dédi: “Shundaq qilip bu hepte kéngesh palatasi maqullighan istratégiyelik riqabet qanunigha, méning shertim bilen birdin bir Uyghurche anglitish béridighan erkin asiya radiyosining yilliq xamchotini 50 pirsenttin artuq köpeytip, 70 milyon dollargha yetküzüsh maddisi kirgüzüldi”.

Kéngesh palata ezasi ed markéy yighinda guwahliq bergen kishilik hoquqni közitish teshkilatining xitay ishliri diréktori doktor sofiy richardson xanimdin erkin asiya radiyosi xizmitining xitaygha, bolupmu Uyghur rayonigha nisbeten qanchilik muhimliqini soridi.

Doktor sofiy richardson buninggha jawaben mundaq dédi: “Kechürüng, sénator markéy! men buni süpetleshke del kélidighan sözni tapalmaywatimen. Muhim! halqiliq! oksigén'gha oxshash! xewiringizde bolghinidek, omumlashturup éytqanda, erkin asiya radiyosi asiyadin, bolupmu xitaygha oxshash yépiq döletlerdin xewerlerni yoruqluqqa élip chiqishta intayin muhim rol oynap kelmekte. Hemishe ular xelq'ara taratqularda bundaq xewerlerni tunji bolup ashkarilighan organ bolup kéliwatidu. Hemde birqisim Uyghur bölümi muxbirlirining yazghan xewerliri üchün töligen bedili intayin qorqunchluq. Mukapatqa érishken zhurnalist gülchéhre xojaning yashan'ghan ata-anisi uning xewerliri netijiside ziyankeshlikke uchridi”.

Bu qétimqi guwahliq bérish yighinida kommunizm qurbanliri fondining tetqiqatchisi doktor adri'an zénz, kishilik hoquqni közitish teshkilatining xitay ishliri diréktori doktor sofiy richardson we Uyghur herikiti teshkilatining ijra'iye mudiri roshen abbas qatarliqlar guwahliq berdi.

Yighin'gha yene marko rubiyo we mit romnéy qatarliq bir qanche nopuzluq kéngesh palata ezaliri qatniship Uyghur weziyitidin endishelen'genlikini bildürüshti.

Bu kéngesh palatasidiki bir nechche tarmaq komitétlarning hemkarliqida yette yildin buyan tunji qétim élip bérilghan birleshme guwahliq bérish yighini iken.