Америка кеңәш палатасида ечилған йиғинида әркин асия радийоси уйғур бөлүмигә юқири баһа берилди

Мухбиримиз җүмә
2021-06-11
Share
Edward-John-Markey-Edward-Markey Америка кеңәш палатаси ташқи ишлар комитети ачқан "шинҗаңдики вәһшийликләр: биз әмди немә қилимиз?" темисидики муһим испат аңлаш йиғинида кеңәш палата әзаси едвард маркей(Edward Markey) әпәнди сөзлимәктә. 2021-Йили 10-июн, вашингтон.
Photo: RFA

10-Июн америка кеңәш палатаси ташқи мунасивәтләр комитетида ечилған бирләшмә тармақ комитетлириниң "шинҗаңдики вәһшийлик" намлиқ гуваһлиқ бериш йиғинида әркин асия радийоси уйғур бөлүмигә юқири баһа берилди.

Мәзкур гуваһлиқ бериш йиғиниға риясәтчилик қилған кеңәш палата әзаси әд маркей әркин асия радийоси уйғур бөлүминиң хитай һәққидики хәвәрлири арқилиқ хитайни өз қилмишлиридин таналмас қилип қойғанлиқини билдүрди.

У мундақ деди: "әркин асия радийоси уйғур бөлүми хитайниң йирақ ғәрбидики милйонлиған уйғурниң вәһшийләрчә қолға елинғанлиқи вә мусулманларға қаритилған қәбиһ җинайәтләр һәққидә хәвәр бериштә алдинқи сәптә туруп, хитай һөкүмитини тутуп туруш лагерлириниң мәвҗутлуқини вә назарәт дөлити қилмишлирини инкар қилалмайдиған һалға чүшүрди".

У йәнә хитай һөкүмитиниң әркин асия радийоси уйғур бөлүминиң мухбирлирини җимиқтуруш үчүн уларниң хитай ичидики аилә әзалирини тутқун қилғанлиқи вә паракәндичилик салғанлиқини шуниңдәк буниң алдини елиш үчүн чоқум һәрикәткә өтүш лазимлиқини ейтти.

У мунда деди: "шундақ қилип бу һәптә кеңәш палатаси мақуллиған истратегийәлик риқабәт қануниға, мениң шәртим билән бирдин бир уйғурчә аңлитиш беридиған әркин асия радийосиниң йиллиқ хамчотини 50 пирсәнттин артуқ көпәйтип, 70 милйон долларға йәткүзүш маддиси киргүзүлди".

Кеңәш палата әзаси әд маркей йиғинда гуваһлиқ бәргән кишилик һоқуқни көзитиш тәшкилатиниң хитай ишлири директори доктор софий ричардсон ханимдин әркин асия радийоси хизмитиниң хитайға, болупму уйғур райониға нисбәтән қанчилик муһимлиқини сориди.

Доктор софий ричардсон буниңға җавабән мундақ деди: "кәчүрүң, сенатор маркей! мән буни сүпәтләшкә дәл келидиған сөзни тапалмайватимән. Муһим! һалқилиқ! оксигенға охшаш! хәвириңиздә болғинидәк, омумлаштуруп ейтқанда, әркин асия радийоси асиядин, болупму хитайға охшаш йепиқ дөләтләрдин хәвәрләрни йоруқлуққа елип чиқишта интайин муһим рол ойнап кәлмәктә. Һәмишә улар хәлқара таратқуларда бундақ хәвәрләрни тунҗи болуп ашкарилиған орган болуп келиватиду. Һәмдә бирқисим уйғур бөлүми мухбирлириниң язған хәвәрлири үчүн төлигән бәдили интайин қорқунчлуқ. Мукапатқа еришкән журналист гүлчеһрә хоҗаниң яшанған ата-аниси униң хәвәрлири нәтиҗисидә зиянкәшликкә учриди".

Бу қетимқи гуваһлиқ бериш йиғинида коммунизм қурбанлири фондиниң тәтқиқатчиси доктор адриан зенз, кишилик һоқуқни көзитиш тәшкилатиниң хитай ишлири директори доктор софий ричардсон вә уйғур һәрикити тәшкилатиниң иҗраийә мудири рошән аббас қатарлиқлар гуваһлиқ бәрди.

Йиғинға йәнә марко рубийо вә мит ромней қатарлиқ бир қанчә нопузлуқ кеңәш палата әзалири қатнишип уйғур вәзийитидин әндишәләнгәнликини билдүрүшти.

Бу кеңәш палатасидики бир нәччә тармақ комитетларниң һәмкарлиқида йәттә йилдин буян тунҗи қетим елип берилған бирләшмә гуваһлиқ бериш йиғини икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт