Amérika prézidénti jow baydin tunji ramizanliq tebrikide Uyghurlarni tilgha aldi

Amérika prézidénti jow baydin 12-aprél küni özi we repiqisi jil xanim namidin amérika we dunyaning bashqa jayliridiki musulmanlargha yollighan ramizanliq tilikide Uyghurlarni tilgha aldi hemde “Uyghurlar duch kéliwatqan kishilik hoquq depsendichilikige dawamliq qarishi turidighan” liqini bildürdi.

Jow baydin bayanatida alahide qilip: “Xitaydiki Uyghurlar, bérmidiki rohin'ga we bashqa musulmanlar duch kéliwatqan kishilik hoquq depsendichilikige dawamliq qarishi turimen” dep körsetti.

Melum bolushiche, bu amérika prézidéntining tunji qétim Uyghurlarning namini biwasite atap turup ramizanliq tebrik yollishi bolup, uning mezkur tebrik bayanati xitayda Uyghurlargha qaritilghan diniy, milliy we irqiy basturush hessilep artqan mezgilge toghra keldi.

Tebrik bayanatida jow baydin nöwettiki wirus wabasigha qarshi tedbirler tüpeylidin ramizan mezgilide musulmanlar ammisining ilgirikidek jem bolup kolléktip ibadet qilishi qiyin'gha chüshsimu, bu ularning allahqa bolghan söygüsi we insaniy mejburiyitige bolghan tonushining téximu yüksilishige tesir körsetmeydu, dep qaraydighanliqini bildürdi. Shuningdek wabagha qarshi küresh mezgilide musulmanlar ammisining herqaysi jaylardiki saqliqni saqlash we ammiwi mulazimet saheside bijanidil xizmet qilghanliqigha bolghan cheksiz minnetdarliqini ipadilidi.

Bayanatta alahide orun alghan yene bir nuqta herqaysi jaylarda yenila oxshimighan derijide mewjut boluwatqan musulmanlargha qarshi keypiyatni keskin eyiblesh boldi. Jow baydin bu toghriliq söz bolghanda “Bu xil birtereplimilik we musulmanlargha hujum qilishtek qilmishlar pütünley xata. Biz buni hergizmu qobul qilalmaymiz” dédi.

Prézidént jow baydin tebrik bayanatning axirida “Qur'an” ning “Nur” sürisidiki “Allah-asmanlarning we zéminning nuridur” dégen ayetni neqil keltürüsh arqiliq yéqin kelgüside nurgha tolghan ümidlerning zulmet üstidin ghalip kélishige bolghan ishenchini ipadilidi.

U ramizanliq bayanatida, bu bir ayning téximu köp xeyrlikke we beriketke seweb bolushini ümid qilidighanliqini bildürdi. Uning bu heqtiki tebrik bayanatnamisi aq sarayning tor bétide hemde amérika prézidéntining twittér bétide élan qilinip, her sahe kishilirining qizghin alqishigha sazawer boldi.