B d t bash katipi we bir qisim döletlerning rehberliri ramizanliq tileklirini bildürdi

Xitay hökümiti Uyghur diyaridiki musulmanlargha séliwatqan diniy we milliy ziyankeshlikini dawamlashturuwatqan bir mezgilde, 2024-yilliq ramizan éyi kirip keldi. Xitaydin bashqa döletler musulmanlarning bu qutluq ramizan éyigha hörmet bildürdi, tilekler tilidi. 

Birleshken döletler teshkilatining bash katipi antoniyo gutérrés (Antonio Guterres) 11-mart küni X  de dunyaning her qaysi jayliridiki musulmanlargha ramizanliq tebrik sözi yollap, “Ramizan éyi tinchliq, chidamchanliq we xeyr-saxawet éyidur؛ ibadet qilidighan, özi bilen hésablishidighan aydur؛  kishiler ara ömlük, muhebbet we öz ara yardemlishishni kücheytidighan aydur” dédi.

Amérika pirézidénti jow baydin 10-mart küni kechte X de yollighan ramizanliq bayanatida, muqeddes ramizan éyining özidin hésab élish we özini yéngilash éyi ikenlikini, bu munasiwet bilen amérika we pütün dunyadiki musulmanlargha bext tileydighanliqini bildürdi.

Uningdin bashqa, en'gliye bash weziri rishi sunak (Rishi Sunak) 10-mart küniX  de yollighan ramizanliq tebrik sözide, musulmanlarning bixeterliki we meschitlerning normal xizmet qilishi üchün hökümettin her yili 29 milyon fond yardem qilidighanliqini bildürdi.

“Türkiye” gézitige chiqqan xewerge köre, türkiye pirézidénti rejep tayyip erdoghanmu 11-mart küni ramizanliq tileklirini bildürüp, “Insha'allah, ramizan éyi türkiye we bashqa döletlerdiki musulmanlargha rehim-shepqet, inaqliq we nijatliq  élip kelgey” dégen. Türkiye diyanet ishliri ministiri eli erbash ramizanliq tilekliride, pütün dunyadiki musulmanlarni ghezzediki we sherqiy türkistandiki musulmanlarning azabini axirlashturushqa chaqirghan.

Xitay metbu'atlirida ramizan éyi heqqide héchqandaq uchur bérilmigen bolup, hetta xitay memliketlik islam jem'iyitimu bu heqte héchnerse élan qilmighan. Xitay kompartiyesining bash sékrétari shi jinping we uningdin burunqilarmu musulmanlarning bu muqeddes künliri heqqide ezeldin héchnéme démigen, belki yéqinqi yillardin buyan shi jinpingning “Dinlarni xitaychilashturush” siyasitining Uyghur diyaridiki musulmanlarni téximu qiyin weziyette qoyghanliqi melum. Xitayning bu qétimqi “Ikki yighini” da ma shingrüyning muxbirlargha “Shinjangda islam dinini xitaychilashturush muqerrer bir yüzlinish” dégenliki Uyghur we bashqa musulmanlarning ramizan éyida roza tutush uyaqta tursun, hetta öz étiqadini saqlap qélishiningmu neqeder qiyin bolidighanliqidin bésharet bergenidi.