Uyghur diyarida téléfon we uchur alaqiliride rast isim qollinish belgilendi

Muxbirimiz ümidwar
2016-10-02
Share

Uyghur rayonida 1 - öktebirdin étibaren téléfon we uchur - alaqe torlirini kimlik kinishkisi boyiche tizimlash bashlan'ghan.

Téléfon we uchur alaqe torliri abonéntlirini öz isim familisi boyiche tizimlashning Uyghur rayonining nöwettiki murekkep weziyitige asasen muqimliqni qoghdash üchün ikenliki bildürülgen.

"Shinjang géziti"ning xewiride tekitlinishiche, mezkur yéngidin yolgha qoyulghan nizam xitay dölet re'isi shi jinping otturigha qoyghan "Shinjang xizmitining bash nishanini izchillashturush we emeliyleshtürüshtiki zor tedbir" bolup hésablinidiken we muqimliq hem eminlikni qoghdash ehmiyitige ige iken.

Uyghur aptonom rayonluq xelq qurultiyining "Téléfon we alaqe tori abonéntlirining rast salahiyet uchurini tizimlap bashqurush nizami" dep atalghan 28 maddiliq mezkur qanuni belgilime resmiy testiqtin ötüp, 1 - öktebir künidin étibaren pütün Uyghur rayoni da'iriside emeliyleshtürülüsh bashlan'ghan bolup, téléfon we alaqe tor abonéntliri birdek halda rast salahiyet uchurini tizimgha alduridiken, bu belgilimige xilapliq qilghuchi shexs yaki téléfon - uchur alaqe tijaretchiliri we yaki shirketler qanuniy jawabkarliqqa tartilidiken.

Xitaydiki, bolupmu Uyghur rayonidiki uchur alaqe we intérnét erkinliki mesilisi uzundin buyan xelq'araliq kishilik hoquq teshkilatlirining diqqitidin orun éliwatqan bolup, nöwette, Uyghur rayonidiki intérnét tor qollan'ghuchilirigha bolghan kontrolluqmu hessilep kücheytilgenliki, kishilerning Uyghur intérnét tor betliride öz kimliki yaki bashqa isim qollinip, erkin munazire élip bérishi yaki pikir bayan qilishining qattiq nazaret astida ikenliki shikayet qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet