Dunyaning her qaysi jayliridiki Uyghurlar roza héytni tebriklidi

Washin'gtondin muxbirimiz jewlan teyyarlidi
2024.04.10

10-Aprél küni pütün dunyadiki musulmanlar mubarek roza héytni kütüwaldi. Muhajirettiki Uyghurlarmu özliri turushluq döletlerdiki Uyghur jama'iti bilen birlikte héyt namizi oqudi we bir-birige héytliq tileklirini bildürdi.

Bu yilliq ramizan we roza héyt yenila xitay hökümitining Uyghur qatarliq milletlerge qaratqan basturushliri dawamliq kücheygen, milyonlarche Uyghur lagér-türmilerge qamalghan, Uyghurlar pütkül millet boyiche xitay hökümitining irqiy qirghinchiliq zulumigha uchrawatqan mezgilige toghra keldi.

Igilishimizche, roza héyt küni amérika, kanada, awstraliye, gérmaniye, türkiye, gollandiye, shiwétsiye, norwégiye, qazaqistan, qirghizistan qatarliq ellerde yashawatqan Uyghur jama'iti özliri turushluq sheherlerdiki meschit-jamelerge jem bolup, roza héyt namizini birlikte oqughan.

Amérika paytexti washin'gton etrapidiki ishtatlarda yashawatqan Uyghurlar wirjiniye ishtati fayrfaks rayonigha jaylashqan wan diyk (Van Dyck) baghchisigha jem bolup, héyt namizini birlikte oqudi. Namazgha jem bolghan 300 din artuq jama'et namazdin kéyin du'a qilip, xitayning zulumi tüpeylidin özlirining héyt xushalliqidinmu mehrum bolghan qérindashlirining tinch-amanliqini tilidi.

10-Aprél küni roza héyt munasiwiti bilen dunya Uyghur qurultiyi bayanat élan qilip, dunyaning her qaysi jayliridiki musulmanlar, jümlidin Uyghurlarning roza héyt bayrimini tebriklesh bilen birge, xitay hökümitining qebih basturush siyasiti astida diniy étiqad erkinlikidin ayrilghan Uyghurlarning qiyin weziyitini qayta eskertti.

Mezkur bayanatta, dunya Uyghur qurultiyining re'isi dolqun eysa mundaq dégen: “Sherqiy türkistandiki Uyghurlarning roza tutushi her yili cheklinip keldi. Chünki xitay hökümiti ularning diniy étiqad erkinlikini basturidighan siyaset yürgüzüwatidu. Xitayning bu qilmishliri ularning Uyghurlarning medeniyiti, étiqadi we kimlikini yoqitish üchün qanat yaydurghan sistémiliq herikitidur” .

Mezkur bayanatta, xitayning Uyghurlarning étiqadi we islam medeniyitige qilghan buzghunchiliqining irqiy qirghinchiliq jinayetlirining muhim bir qismi ikenliki körsitilgen. Andin “Pütün dunya musulmanliri mubarek roza héyt bayrimini tebriklewatqan mushu künde, dunya Uyghur qurultiyi musulman döletler we islamiy teshkilatlarni xitayning jinayitige süküt qilishni, hetta xitay bilen hemkarlishishni toxtitishqa chaqiriq qilidu” déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.