Бу йиллиқ роза һейт уйғур дияриниң бәзи җайлирида «контроллуқта тәбрикләнди»

Мухбиримиз әркин
2020-05-25
Елхәт
Пикир
Share
Принт

Чәтәлдики уйғурлар хитайдин тарқалған корона вируси юқуми сәвәблик бу йиллиқ роза һейтни аилисидә күтүвалған мәзгилдә хитай һөкүмити уйғур дияриниң бәзи җайлирида «контроллуқ астидики роза һейт тәбрикләш паалийәтлири» ни уюштурған. Көзәткүчиләрниң илгири сүрүшичә, рамзанда роза тутушни чәкләп, роза тутқунларни паш қилиш һәрикити елип барған хитай даирилириниң роза һейт күни райондики бәзи мәсчитләрдә «контроллуқ» һейт намизи оқутуши, бәзи саяһәт нуқтилирида сама усули ойнитиштәк «контроллуқ астидики тәбрикләш паалийәтлирини уюштуруши» пүтүнләй «икки йүзлимичилик» икән.

Иҗтимаий таратқулардики бәзи син көрүнүшлиридин мәлум болушичә, 24-май күни үрүмчидики ноғай мәсчити қатарлиқларда һейт намизи оқулған. Лекин, қәшқәрдики һейтгаһ җамәсиниң алдида бир түркүм кишиләр сама ойнашқа уюштурулған болсиму, лекин һейтгаһ җамәсидә намаз оқулған-оқулмиғанлиқи ениқ әмәс. Көзәткүчиләр, һейт намизиға қатнашқан мусулманларниң сани, тәбрикләш паалийәтлириниң көлимигә қарап, бу йиллиқ роза һейтниң өткән йилқиға охшашла пиланлиқ, тәшкиллик, контроллуқта өткүзүлгәнлики, униң дуняға «уйғурниң диний әркинликигә һөрмәт қиливатимиз» дегән сигнални бәрмәкчи болғанлиқини билдүрмәктә.

Хитай һөкүмити өткән йилқи роза һейтни хитайниң «таңзоңза байрими» билән биргә өткүзүп, мусулманларни хитайлар билән таңзоңза йәп байрам өткүзүшкә тәшкиллигәниди. Хитай һөкүмәт мәтбуатлириниң хәвиридин мәлум болушичә, йәрлик даириләр, кәнт партийә секретарлири бу йил роза һейтини җәнубтики йеза-базар, кәнтләрдә өйму-өй кирип тәбриклигәч буни бейҗиңда ечиливатқан икки йиғинниң тәшвиқатини қилидиған сиясий паалийәткә айландурған.

Көзәткүчиләрниң илгири сүрүшичә, хитай һөкүмити уйғур диярида роза һейтта байрам кәйпияти яритишқа тиришқан болсиму, лекин дуняда лагерлардики 3 милйондәк уйғур вә башқа мусулманларниң ақивитини сүрүштүрүш һәққидики садалар күнсери күчәймәктикән.

Пикирләр (0)
Share
Толуқ бәт