Bu yilliq roza héyt Uyghur diyarining bezi jaylirida "Kontrolluqta tebriklendi"

Muxbirimiz erkin
2020-05-25
Share

Chet'eldiki Uyghurlar xitaydin tarqalghan korona wirusi yuqumi seweblik bu yilliq roza héytni a'iliside kütüwalghan mezgilde xitay hökümiti Uyghur diyarining bezi jaylirida "Kontrolluq astidiki roza héyt tebriklesh pa'aliyetliri" ni uyushturghan. Közetküchilerning ilgiri sürüshiche, ramzanda roza tutushni cheklep, roza tutqunlarni pash qilish herikiti élip barghan xitay da'irilirining roza héyt küni rayondiki bezi meschitlerde "Kontrolluq" héyt namizi oqutushi, bezi sayahet nuqtilirida sama usuli oynitishtek "Kontrolluq astidiki tebriklesh pa'aliyetlirini uyushturushi" pütünley "Ikki yüzlimichilik" iken.

Ijtima'iy taratqulardiki bezi sin körünüshliridin melum bolushiche, 24-may küni ürümchidiki noghay meschiti qatarliqlarda héyt namizi oqulghan. Lékin, qeshqerdiki héytgah jamesining aldida bir türküm kishiler sama oynashqa uyushturulghan bolsimu, lékin héytgah jameside namaz oqulghan-oqulmighanliqi éniq emes. Közetküchiler, héyt namizigha qatnashqan musulmanlarning sani, tebriklesh pa'aliyetlirining kölimige qarap, bu yilliq roza héytning ötken yilqigha oxshashla pilanliq, teshkillik, kontrolluqta ötküzülgenliki, uning dunyagha "Uyghurning diniy erkinlikige hörmet qiliwatimiz" dégen signalni bermekchi bolghanliqini bildürmekte.

Xitay hökümiti ötken yilqi roza héytni xitayning "Tangzongza bayrimi" bilen birge ötküzüp, musulmanlarni xitaylar bilen tangzongza yep bayram ötküzüshke teshkilligenidi. Xitay hökümet metbu'atlirining xewiridin melum bolushiche, yerlik da'iriler, kent partiye sékrétarliri bu yil roza héytini jenubtiki yéza-bazar, kentlerde öymu-öy kirip tebrikligech buni béyjingda échiliwatqan ikki yighinning teshwiqatini qilidighan siyasiy pa'aliyetke aylandurghan.

Közetküchilerning ilgiri sürüshiche, xitay hökümiti Uyghur diyarida roza héytta bayram keypiyati yaritishqa tirishqan bolsimu, lékin dunyada lagérlardiki 3 milyondek Uyghur we bashqa musulmanlarning aqiwitini sürüshtürüsh heqqidiki sadalar künséri kücheymektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet