Amérika Uyghurliri roza héyt namizini birlikte oqudi

Amérikadiki Uyghurlar üchün xasiyetlik pa'aliyetlerning biri bolghan 2019-yilliq roza héyt namizi 4-iyun küni fayrfaks shehridiki “Uyghur karxanichilar tori” ning pa'aliyet zalida oquldi. Amérika Uyghur birleshmisi teshkilligen bu yilliq héyt namizigha washin'gton shehri, wirjiniye we mariyland shitatliridiki bir qisim Uyghurlar, shundaqla amérikining paytexti washin'gton shehride dunya Uyghur qurultiyi teshkilligen “Uyghur heptiliki” pa'aliyitige qatnishish üchün dunyaning herqaysi jayliridin kelgen Uyghur jama'iti qatnashti.

Fayrfaks shehridiki Uyghur diniy zatliridin nurdun hajim bu qétimqi héyt namizigha imamliq qildi. Zalgha yighilghan nechche yüz Uyghur jama'iti Uyghur tilida héyt xutbisi anglidi. Namazdin kéyin jama'et birlikte wetendiki uruq-tughqanliri, shuningdek özliri tonuydighan we tonumaydighan barliq qérindashlirigha xatirjemlik we amanliq tilidi. Shuning bilen birge bigunah halda lagérlargha qamalghan we her xil muddette qamaq jazasigha höküm qilin'ghan kishilerge erkinlik we hörlük tilep du'agha qol kötürdi.

Gerche muhajirettiki barliq Uyghurlargha oxshash amérikadiki Uyghur jama'itimu héyt xoshalliqini öz uruq-tughqanliri bilen birlikte tebriklesh imkanigha ige bolmisimu, mushu qétimqi pa'aliyette Uyghurlardiki esirler boyi dawam qilip kelgen kolléktipliq we ömlük rohi yene bir qétim jari boldi. Shundaqla muhajirette ösüp-yétiliwatqan Uyghur gödeklirining Uyghurluq kimliki heqqidiki chüshenchilirige yéngi mezmunlar singdürüldi.

Namazdin kéyin Uyghur jama'iti birlikte nashta qildi. Herqaysiy Uyghur a'ililiri xalis teyyarlap kelgen mol we rengga-reng yémeklikler bilen birlikte nashta qilghach Uyghurlarning uruq-tughqanlarsiz ötüwatqan roza héytida hemmila Uyghur bir-birige qérindashtek bolup ketken idi.