Roza héyt küni “Qeshqer xelq meydani” xitaylarningmu oyun-tamasha qilidighan meydanigha aylan'ghan

Washin'gtondin muxbirimiz jewlan teyyarlidi
2024.04.10

Ramizanda roza tutush cheklinip, héyt namizi oqushmu xeterlik ishqa aylan'ghan Uyghur diyarida héyt tentenisi hazir xitaylar ariliship oynaydighan we tamasha köridighan pa'aliyetke aylinip qalghan.

Xitayning “Tengritagh tori” we “Shinjang géziti tori” 10-aprél küni tarqatqan süretlik xewerge qarighanda, qeshqerdiki “Her millet xelqi” qeshqer xelq meydanigha toplinip, “Roza héytliq meshrep” oynighan bolup, meydan'gha toplan'ghan kishilerning ichide bu tamashigha qétilghan xitaylarningmu xéli köplüki roshen körülidu. Bir sürette, mushu pa'aliyet üchün alahide yasinip, girim qilghan Uyghur qizi bilen bir xitayning birlikte ussul oynawatqan körünüshi bérilgen. Uyghur, tajik, qirghiz millitining kiyimlirini kiygen, qarimaqqa artisqa oxshaydighan kishilerning turghan turqi we ussul shekilliridin ularning mexsus bu pa'aliyet üchün obraz wekili bolup kelgenliki ayan bolmaqta. Moda kiyin'gen xitaylar bilen milliyche kiyin'gen artislarning maw zédung heykili aldida we qoyuq xitayche pasonda bézelgen meydanda bir-birige qoshulup ussul oynishi, qandaqtur xitay hökümitining teshwiqatidiki “Güzel we bextiyar shinjang” menzirisini hasil qilghandek körsitilgen.

Radiyomiz muxbirining éniqlishiche, xitay hökümiti bir ay ramizan boyiche, her qaysi jaylarda roza tutushni cheklep, yep-ichish we köngül échish pa'aliyetlirini köplep uyushturghan. Qeshqerdiki roza héytliq tebriklesh pa'aliyitidin qarighanda, bu bayram Uyghur qatarliq milletler artistek yasinip oyun qoyidighan, atalmish “Shinjangdiki her millet xelqning bextiyar yashawatqanliqi” ni körsitidighan teshwiqat pa'aliyitige aylinip qalghan؛ Uyghurlarning islam medeniyiti bilen birleshken örp-adetliri, qa'ide yosunliri tamamen yeklen'gen, xitayning tesiri barghanche singip kétiwatqan bir weziyet shekillen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.