Путинниң президентлиққа сайлиниши хитайниң қизғин тәбриклиши, ғәрб әллириниң соғуқ муамилисигә учриди

Мухбиримиз әркин
2018-03-19
Share

Русийәдә өткүзүлгән президент сайлимида владимир путин қайта президентлиққа сайланди. У сайлам белитиниң аз кәм 77% гә еришип, йәнә 6 йил вәзипидә олтуруш һоқуқиға еришкән.

Б б с ниң хәвәр қилишичә, путинниң сайламда ғәлибә қилиши хитайниң қизғин тәбриклишигә еришкән болсиму, лекин ғәрб дөләтлириниң соғуқ муамилисигә учриған.

Хитай рәиси ши җинпиң дүшәнбә күни путинға дәрһал тәбрик телеграммиси әвәтип, уни тәбриклигән. У тәбрик телеграммисида русийә-хитай истратегийәлик шериклик мунасивитиниң “тарихтики әң яхши мәзгил”дә туруватқанлиқини тәкитләп, русийәниң путин дәвридә қолға кәлтүргән “нәтиҗилири”гә юқири баһа бәргән.

Русийә бу қетимқи президентлиқ сайлими билән хитай хәлқ қурултийиниң мәмликәтлик йиғини охшаш мәзгилдә өткүзүлди. Путин дүшәнбә күни президентлиққа сайлиништин икки күн аввал хитай хәлқ қурултийи ши җинпиңниң дөләт рәисликигә сайланғанлиқи елан қилинған.

Путин ши җинпиңға тәбрик телеграммиси әвәтип, уни тәбриклигән иди. Лекин б б с ниң билдүрүшичә, путинниң қайта президентлиққа сайлиниши русийә билән ғәрбниң мунасивити яманлишип кәткән мәзгилгә тоғра кәлгән.

Йеқинда әнглийәдә русийәлик сабиқ бир җасусни зәһәрләш вәқәси йүз берип, ғәрб билән русийәниң мунасивити техиму җиддийлишип кәткән.

Германийә ташқи ишлар министири маас, русийәдики сайламниң адил болмиғанлиқини билдүргән. У, русийәниң алақә қилиш мүшкүл бир дөләт икәнликини тәкитлигән.

Путин 1999‏-тартип һазирғичә изчил баш министир яки президентлиқ вәзиписини атқуруп кәлмәктә.

Кишилик һоқуқ көзитиш тәшкилати йеқинда елан қилған бир доклатида, путин вә ши җинпиңға охшаш рәһбәрләр дуняда истибдатлиқниң күчийип, кишилик һоқуқ, демократийәниң чекинип кетишигә сәвәб болуватқанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт