Русийә хитай билән бирлишип, американиң һәрқандақ чәклимисигә тақабил туридиғанлиқини җакарлиған

Русийә пирезиденти виладимир путинниң әмәлдари, русийә бихәтәрлик кеңишиниң катипи сергей шойгу 12-ноябир күни хитай ташқи ишлар министириға қилған сөзидә, американиң кәлгүсидә русийә билән хитайни контрол қиливелишиға қарши турушниң нөвәттә бу икки дөләтниң әң муһим вәзиписи икәнликини тәкитлигән.

“руйтерс агентлиқи” ниң 12-ноябир елан қилған бу хәвиридә дейилишичә, америка хитайни әң чоң риқабәтчи, русийәни болса әң чоң тәһдит дәп қарап кәлгән. Америка пирезиденти болуп сайланған доналд трамп хитай вә башқа дөләтләргә еғир таможна беҗи алидиғанлиқини елан қилип, сода урушиниң кәскинлишидиғанлиқидин бешарәт бәргән.

Русийә дөләт бихәтәрлик кеңишиниң катипи сергей шойгу бейҗиңда хитай ташқи ишлар министири ваң йи билән көрүшкәндә, “москва билән бейҗиң оттурисидики күчлүк мунасивәт дуняни муқимлаштуридиған амил” дәп тәриплигән. У йәнә русийә ахбарат органлириниң сөзини нәқил кәлтүрүп: “мениңчә, нөвәттики әң муһим вәзипә, америка вә униң иттипақдашлири йолға қойған русийә билән хитайни тәң чәкләш сияситигә қарши туруш” дегән. Хитай ташқи ишлар министири ваң йиму уни қоллап: “хәлқара вәзийәт мурәккәплишип, ташқи хирис көпәйгәнсери, икки тәрәп ортақ мәнпәәтни қоғдаш үчүн бир сәптә чиң туруши керәк” дегән.

Хитай тәрәп бу учришишқа, “икки тәрәп ортақ көңүл бөлидиған истратегийәлик хәвпсизлик мәсилисидә әтраплиқ вә чоңқур пикир алмаштуруп, өзара ишәнчни күчәйтти” дәп баһа бәргән.

Ши җинпиң билән путин соғуқ мунасивәтләр урушидин кейин американиң һөкүмранлиқ дәвриниң аяғлашқанлиқини ғәйрий рәсмий шәкилдә ипадиләп кәлгән болуп, америкаға қарши “чәксиз һәмкарлиқ” орнитип, өзара бериш-келишни көпәйткәниди.