Rusiye xitay bilen birliship, amérikaning herqandaq cheklimisige taqabil turidighanliqini jakarlighan

Rusiye pirézidénti wiladimir putinning emeldari, rusiye bixeterlik kéngishining katipi sérgéy shoygu 12-noyabir küni xitay tashqi ishlar ministirigha qilghan sözide, amérikaning kelgüside rusiye bilen xitayni kontrol qiliwélishigha qarshi turushning nöwette bu ikki döletning eng muhim wezipisi ikenlikini tekitligen.

“Ruytérs agéntliqi” ning 12-noyabir élan qilghan bu xewiride déyilishiche, amérika xitayni eng chong riqabetchi, rusiyeni bolsa eng chong tehdit dep qarap kelgen. Amérika pirézidénti bolup saylan'ghan donald tramp xitay we bashqa döletlerge éghir tamozhna béji alidighanliqini élan qilip, soda urushining keskinlishidighanliqidin bésharet bergen.

Rusiye dölet bixeterlik kéngishining katipi sérgéy shoygu béyjingda xitay tashqi ishlar ministiri wang yi bilen körüshkende, “Moskwa bilen béyjing otturisidiki küchlük munasiwet dunyani muqimlashturidighan amil” dep teripligen. U yene rusiye axbarat organlirining sözini neqil keltürüp: “Méningche, nöwettiki eng muhim wezipe, amérika we uning ittipaqdashliri yolgha qoyghan rusiye bilen xitayni teng cheklesh siyasitige qarshi turush” dégen. Xitay tashqi ishlar ministiri wang yimu uni qollap: “Xelq'ara weziyet murekkepliship, tashqi xiris köpeygenséri, ikki terep ortaq menpe'etni qoghdash üchün bir septe ching turushi kérek” dégen.

Xitay terep bu uchrishishqa, “Ikki terep ortaq köngül bölidighan istratégiyelik xewpsizlik mesiliside etrapliq we chongqur pikir almashturup, öz'ara ishenchni kücheytti” dep baha bergen.

Shi jinping bilen putin soghuq munasiwetler urushidin kéyin amérikaning hökümranliq dewrining ayaghlashqanliqini gheyriy resmiy shekilde ipadilep kelgen bolup, amérikagha qarshi “Cheksiz hemkarliq” ornitip, öz'ara bérish-kélishni köpeytkenidi.