Rusiye we xitay dölet mudapi'e hemkarliqini téximu kücheytidighanliqini jakarlidi

“Roytéris” ning 10-ayning 15-künidiki xewirige asaslan'ghanda, rusiye bilen xitay munasiwetni kücheytish üchün “Emeliy” mudapi'e we herbiy söhbet ötküzgen. Rusiye dölet mudapi'e ministiri seyshenbe küni amérikining asiyada tesirini kéngeytish tirishchanliqini tenqid qilish bilen birlikte, moskwa bilen béyjingning “Cheklimige uchrimaydighan” hemkarliqni téximu kücheytidighanliqini otturigha qoyghan idi.

Rusiye dölet mudapi'e ministiri andréy bélosow (Andrei Belousov) mundaq dégen: “Rusiye bilen xitay herbiy tarmaqliri dunya tertipi we boluwatqanlargha baha bérishte ortaq pikirge ige. Biz nöwettiki weziyette néme qilish kéreklikini ortaq tonup yettuq”.

Xitay merkizi herbiy ishlar komitétining mu'awin re'isi jang yöshya (Zhang Youxia) rusiye bilen “Nahayiti ehmiyetlik” söhbet élip barghanliqini éytqan. Söhbettin kéyin xitay dölet mudapi'e ministirliqi mundaq dégen: “Her ikki terep herbiy munasiwetni chongqurlashturush we kéngeytish we yuqiri qatlamliq uchrishishlarni saqlashni ümid qilidu”.

 Rusiye pirézidénti wladimir putin 16-may küni xitaygha ikki künlük resmiy ziyaret qilghan idi. Rusiye pirézidénti putin bilen xitay re'isi shi jinpingning béyjingdiki uchrishishida, ular rusiye we xitayning birleshme bayanatini élan qilip, özlirining “Istratégiyelik munasiwiti” ni qayta tekitligen we amérikagha qarshi hemkarlishishqa wede bérishken idi.

10-Iyul washin'gtonda échilghan shimaliy atlantik ehdi teshkilati (nato) dölet bashliqliri yighinida, nato gha eza 32 dölet rehbirining qoshulushi bilen xitayning nato ning bixeterlikige biwasite tehdit élip kelgenliki jakarlan'ghanidi. Bu nato ning tunji qétim xitayni nato döletlirining istratégiyelik menpe'eti üchün tehdit dep étirap qilishi bolup, uningdimu xitay rusiye armiyesige zörür bolghan “Qoral zapchasliri” we bashqa téxnikilar bilen teminleshni toxtitishqa chaqirilghanidi.