Русийәниң он нәччә шәһиридә хитайға қарши наразилиқ намайиши өткүзүлгән

Мухбиримиз шөһрәт һошур
2019-03-26
Share

Йеқинқи икки һәптидин буян русийәниң он нәччә шәһиридә, хитайниң байқал көли яқисида ботулкилиқ су завути қуруш пиланиға қарита наразилиқ намайиши өткүзүлгән.

Америка авазиниң алдинқи күни бу һәқтә бәргән хәвиридә дейилишичә, мәзкур қурулушиниң байқал көли муһитини бузуш еһтималлиқи русийә аһалилирини әндишигә салған.

Аһалиләр наразилиқни намайиш өткүзүштин башқа йәнә аммиви имза топлаш вә қурулушни тохтитиш һәққидә сотқа әрз сунуш шәклидә елип барған. Намайиш иркитуски қатарлиқ байқал көлигә қошна шәһәрләрдин москаваға қәдәр 10 нәччә шәһәрдә өткүзүлгән. Намайишчилар сепигә сиясәтчиләрдин тартип, марийә кожевникова қатарлиқ тонулған сәнәтчиларму иштирак қилған.

Намайиш давамида русийә коммунистик партийәси рәһбәрлири президенти владимир путинни байқал көлини хитайға сетиветиш билән әйиблигән. Һөкүмәт тәрәп, хитайниң мәзкур қурулушини көздин кәчүридиғанлиқи вә бәлгиләнгән муһит бихәтәрлик өлчәмлиригә әмәл қилған-қилмиғанлиқини тәкшүридиғанлиқи һәққидә ипадә билдүргән.

Хәвәрдә әскәртилишичә, йәрлик сот орунлиридин бири хитайниң ботулкилиқ су завути қурулушни тохтитиш һәққидә һөкүм чиқирип болған.

Бу наразилиқ намайишлири һәққидә пикир баян қилған көзәткүчиләр, бу йәрдики мәсилиниң сәвәби ялғуз муһит әндишиси әмәслики, йеқинқи йилларда русийәликләрниң нәзиридики хитай образида хунүклишиш болғанлиқи вә буниң кәлгүсидики икки дөләт мунасивәтлиридики сүркилишләргә сәвәб болуш еһтималлиқини оттуриға қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт