Rusiyening on nechche shehiride xitaygha qarshi naraziliq namayishi ötküzülgen

Muxbirimiz shöhret hoshur
2019-03-26
Share

Yéqinqi ikki heptidin buyan rusiyening on nechche shehiride, xitayning bayqal köli yaqisida botulkiliq su zawuti qurush pilanigha qarita naraziliq namayishi ötküzülgen.

Amérika awazining aldinqi küni bu heqte bergen xewiride déyilishiche, mezkur qurulushining bayqal köli muhitini buzush éhtimalliqi rusiye ahalilirini endishige salghan.

Ahaliler naraziliqni namayish ötküzüshtin bashqa yene ammiwi imza toplash we qurulushni toxtitish heqqide sotqa erz sunush sheklide élip barghan. Namayish irkituski qatarliq bayqal kölige qoshna sheherlerdin moskawagha qeder 10 nechche sheherde ötküzülgen. Namayishchilar sépige siyasetchilerdin tartip, mariye kozhéwnikowa qatarliq tonulghan sen'etchilarmu ishtirak qilghan.

Namayish dawamida rusiye kommunistik partiyesi rehberliri prézidénti wladimir putinni bayqal kölini xitaygha sétiwétish bilen eyibligen. Hökümet terep, xitayning mezkur qurulushini közdin kechüridighanliqi we belgilen'gen muhit bixeterlik ölchemlirige emel qilghan-qilmighanliqini tekshüridighanliqi heqqide ipade bildürgen.

Xewerde eskertilishiche, yerlik sot orunliridin biri xitayning botulkiliq su zawuti qurulushni toxtitish heqqide höküm chiqirip bolghan.

Bu naraziliq namayishliri heqqide pikir bayan qilghan közetküchiler, bu yerdiki mesilining sewebi yalghuz muhit endishisi emesliki, yéqinqi yillarda rusiyeliklerning neziridiki xitay obrazida xunüklishish bolghanliqi we buning kelgüsidiki ikki dölet munasiwetliridiki sürkilishlerge seweb bolush éhtimalliqini otturigha qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet