Уйғур елидә йеңидин башланған «омумий хәлқ һәқсиз саламәтлик тәкшүрүш» һәрикитидики өзгиришләр диққәт қозғимақта

Мухбиримиз ирадә
2019-03-01
Елхәт
Пикир
Share
Принт

Хитай һөкүмити уйғур елидә йеңи бир нөвәтлик «омумий хәлқ һәқсиз саламәтлик тәкшүрүш» һәрикитини башлиған.

Бу һәқтә поскам вә бай наһийәлик һөкүмәт тор бәтлиридә берилгән хәвәрләрдин қариғанда, даириләр нөвәттә уйғур елидики һәрқайси наһийәләрдә «2019-йиллиқ омумий хәлқ саламәтлик тәкшүрүш хизмити» ни башлиған. Бирақ бу хизмәтниң пүткүл уйғур райони яки пәқәт җәнубтики наһийәләрни асас қилип туруп елип бериливатқанлиқи ениқ әмәс.

Поскам наһийәсиниң хәвиридә көрситилишичә, 4-нөвәтлик «омумий хәлқ һәқсиз саламәтлик тәкшүрүш хизмити» икки айлиқ тәйярлиқтин кейин 10-феврал күни рәсмий башланған. Поскам наһийәси бу йил ичидә поскамдики 153миң нәпәрдин артуқ кишини «саламәтлик тәкшүрүш» кә қатнаштурушни пиланлимақтикән.

Уйғур район даирилири 2016-йили 9-айда башлиған тунҗи «омумий хәлқ саламәтлик тәкшүрүш» һәрикитидә райондики 18 милйондин артуқ кишиниң қан әвришкисини елип, саламәтлик архипи турғузған иди. Бу һәрикәт чәтәлләрдики уйғур тәшкилатлири вә хәлқара кишилик һоқуқ органлириниң күчлүк диққитини қозғиған. Улар бу һәқтики баянлирида хитай һөкүмитиниң «һәқсиз саламәтлик тәкшүрүш» дегән нам астида шәхсләрниң ген учурлирини йиғиватқанлиқини вә буниң интайин хәтәрлик икәнликини билдүргән.

Поскам наһийәлик һөкүмәт тор бетидики хәвәрдин қариғанда, бу нөвәтлик «саламәтлик тәкшүрүш» пәқәт қан елиш биләнла чәклинип қалмайдикән. У адәттики омумйүзлүк тәкшүрүшләрдин башқа йәнә, ташқи кесәлликләр, аяллар кесәлликлири, ички кесәлликләр, радияктиплиқ тәкшүрүш, ултра долқунлуқ арқилиқ бәш әза тәкшүрүши, йүрәк қан томур тәкшүрүши қатарлиқларни өз ичигә алидикән.

Гәрчә юқиридики һөкүмәт тор бәтлири буни «һөкүмәтниң хәлққә көңүл бөлгәнлики, кесәлликләрни алдин байқап, хәлқниң разимәнликини ашурғанлиқини илгири сүргән болсиму, бирақ чәтәлләрдики уйғур көзәткүчиләр бундақ тәкшүрүшләрниң әсли мәқситидин әндишиләнмәктә.

Пикирләр (0)
Share
Толуқ бәт