Uyghur élide yéngidin bashlan'ghan "Omumiy xelq heqsiz salametlik tekshürüsh" herikitidiki özgirishler diqqet qozghimaqta

Muxbirimiz irade
2019-03-01
Élxet
Pikir
Share
Print

Xitay hökümiti Uyghur élide yéngi bir nöwetlik "Omumiy xelq heqsiz salametlik tekshürüsh" herikitini bashlighan.

Bu heqte poskam we bay nahiyelik hökümet tor betliride bérilgen xewerlerdin qarighanda, da'iriler nöwette Uyghur élidiki herqaysi nahiyelerde "2019-Yilliq omumiy xelq salametlik tekshürüsh xizmiti" ni bashlighan. Biraq bu xizmetning pütkül Uyghur rayoni yaki peqet jenubtiki nahiyelerni asas qilip turup élip bériliwatqanliqi éniq emes.

Poskam nahiyesining xewiride körsitilishiche, 4-nöwetlik "Omumiy xelq heqsiz salametlik tekshürüsh xizmiti" ikki ayliq teyyarliqtin kéyin 10-féwral küni resmiy bashlan'ghan. Poskam nahiyesi bu yil ichide poskamdiki 153ming neperdin artuq kishini "Salametlik tekshürüsh" ke qatnashturushni pilanlimaqtiken.

Uyghur rayon da'iriliri 2016-yili 9-ayda bashlighan tunji "Omumiy xelq salametlik tekshürüsh" herikitide rayondiki 18 milyondin artuq kishining qan ewrishkisini élip, salametlik arxipi turghuzghan idi. Bu heriket chet'ellerdiki Uyghur teshkilatliri we xelq'ara kishilik hoquq organlirining küchlük diqqitini qozghighan. Ular bu heqtiki bayanlirida xitay hökümitining "Heqsiz salametlik tekshürüsh" dégen nam astida shexslerning gén uchurlirini yighiwatqanliqini we buning intayin xeterlik ikenlikini bildürgen.

Poskam nahiyelik hökümet tor bétidiki xewerdin qarighanda, bu nöwetlik "Salametlik tekshürüsh" peqet qan élish bilenla cheklinip qalmaydiken. U adettiki omumyüzlük tekshürüshlerdin bashqa yene, tashqi késellikler, ayallar késellikliri, ichki késellikler, radiyaktipliq tekshürüsh, ultra dolqunluq arqiliq besh eza tekshürüshi, yürek qan tomur tekshürüshi qatarliqlarni öz ichige alidiken.

Gerche yuqiridiki hökümet tor betliri buni "Hökümetning xelqqe köngül bölgenliki, késelliklerni aldin bayqap, xelqning razimenlikini ashurghanliqini ilgiri sürgen bolsimu, biraq chet'ellerdiki Uyghur közetküchiler bundaq tekshürüshlerning esli meqsitidin endishilenmekte.

Toluq bet