Шаңхәй санлиқ мәлумат амбирида 8000 дин артуқ уйғурниң "террорчи" дәп хатириләнгәнлики ашкариланди

Мухбиримиз ирадә
2021-04-01
Share

Австралийәниң "ABC" қанилида хитай һөкүмитиниң уйғурларға қаратқан назаритиниң көлими намаян қилинған интайин муһим бир парчә хәвәр елан қилинди.

Бир қисим кишилик һоқуқ паалийәтчилири өткән йилиниң ахирида шаңхәй шәһәрлик бихәтәрлик санлиқ мәлумат мулазиметирға хаккерлиқ һуҗуми қозғаш арқилиқ, мулазиметирда қәйт қилинған 1 милйондин артуқ санлиқ мәлуматқа еришкән. Кейин улар бу санлиқ мәлуматларни австралийә бихәтәрлик хадимлири, ABC қанили вә хәлқарадики аз сандики хәлқаралиқ ахбарат органлириға әвәтип бәргән болуп, бу хитайниң аммиви көзитиш системисиниң тәрәққияти вә көлимини намаян қилип беридиған надир пакит икән.

Шаңхәй шәһәрлик бихәтәрлик санлиқ мулазиметирида ишарәт бәлгиси қоюлған 8 миңдин артуқ уйғур бар болуп, уларниң исми, адреси, кимлик номури, вә уларниң аталмиш "террорлуқ" җинайити тәпсилий хатириләнгән. Тизимликтә 400 дин ошуқ қорамиға йәтмигән уйғур балилири болуп, әң кичики техи 5 яшта икән. Уларниң бир қисимлири назарәт қилинған вә биваситә сорақ қилинғанкән.

Бу санлиқ мәлумат амбирида юқирида "террорчи" дәп аталған миңлиған уйғурниң назарәт қилиниш, тутуп турулуш вә сорақ қилиш җәрянлири хатириләнгән болуп, көзәткүчиләр буни хитайниң кәң көләмлик қара тизимликлириниң кичиккинә әвришкиси, дәп қаримақта. Мәзкур қанал бу тизимликтә исми болған вә һазир түркийәдә яшаватқан икки нәпәр уйғур билән сөзләшкән.

Юқиридики санлиқ мәлумат амбири йәнә, 2017-йилдин башлап шаңхәйгә саяһәткә барғанда қизил бәлгә қоюп қоюлған 5000 дин артуқ чәтәлликниң паспорт тәпсилатлири вә сүрәтлириниму өз ичигә алидиған болуп, австралийә даирилири һазир өз пуқралириниму өз ичигә алидиған бу кишиләргә немә үчүн ишарәт бәлгиси қоюлғанлиқини тәкшүрүватқан икән.

Юқиридики бу һөҗҗәт хитай һөкүмитиниң уйғурлар вә һәтта барлиқ дөләт пуқралирини мутләқ назарәт астиға елиш нишанини, униң санлиқ мәлумат амбириниң көлимини ашкарилап беридиған интайин муһим материял болуп һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт