Xitay teshwiqat tarmaqliri chet eldiki xitay téxnika shirketliri arqiliq sanliq melumat toplimaqtiken

Washin'gtondin muxbirimiz erkin teyyarlidi
2024.05.03

Awstraliye istratégiyelik siyaset instituti 1-may küni tetqiqat doklati élan qilip, xitay teshwiqat tarmaqlirining chet eldiki xitay téxnika shirketliri arqiliq, chet el tor abuntlirining sanliq melumatlirini toplaydighanliqini ilgiri sürgen.

“Washin'gton pochtisi” gézitining xewer qilishiche, xitayning dölet kontrolluqidiki teshwiqat tarmaqliri chet el tor abuntlirining sanliq melumatlirini toplashta, témo qatarliq dangliq xitay tor soda supiliri bilen öz ara masliship heriket qilmaqta iken. Xewerde bu sanliq melumatlarning saxta uchur tarqitishni kücheytish we xitayning chet eldiki bashqa teshwiqat pa'aliyetliride ishlitilidighanliqini bildürgen.

“Washin'gton pochtisi” ning éytishiche, doklatta xitay dölitining kontrolluqidiki teshwiqat tarmaqlirining tor soda supisi we éléktironluq tor oyuni supisini öz ichige alghan dangliq tor supilirining ‍öz'ara baghlinishliq ikenlikini éniqlap chiqqan bolup, supilarning amérika we bashqa jaylarda yüz milyonlighan abunti bar iken. Mezkur doklat amérika dölet mejlisining yéqinda arqa-arqidin qanun maqullap, xitayning bayti dens shirkitige qarashliq tiktok ijtima'iy alaqe supisidin xitay bilen bolghan alaqisini üzüshini telep qilishi, pirézidént baydénning bu qanun'gha resmiy qol qoyushi arqisidinla élan qilin'ghan.

Amérika dölet mejlisi ezaliri xitay ijtima'iy alaqe supilirining amérikaliq abuntlar üchün dölet xewpsizlik tehditi peyda qilidighanliqini agahlandurup kelgen. “Washin'gton pochtisi” ning bildürüshiche, ‍awstraliye istratégiyelik siyaset institutining mezkur doklatni teyyarlashqa yétekchilik qilghan sabiq aliy tetqiqatchisi samanta xofman: “Ular bu shirketlerdin paydilinip, qimmetlik istratégiyelik sanliq melumatlargha ériship keldi, shundaqla bu sanliq melumatlarni xitayning ichi we sirtida pishshiqlap ishlep hem teshwiqat xizmetliride qollinishigha türtke boldi” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.