Чағанниң алди-кәйнидә шаярниң вәзийити җиддийләшкән

Бир радио аңлиғучимиз йоллиған мәлуматқа қариғанда, чағанниң алди-кәйнидә ақсу шаяр наһийисиниң вәзийити интайин җиддийләшкән, һөкүмәт хадимлири 24 саәтләп мәсчит беқишқа қуюлған.

Униң йәрлик һөкүмәтниң бир шопуридин игилишичә, шаяр наһийисидә динға қаритилған чәкләш хели бурунла күчәйтилгән болуп, кимликсиз мәсчиткә кириш мәни қилинған.

Униңдин башқа шаярда аялларниң яғлиқ артиши, әрләрниң сақал-бурут қоюшиға қаритилған чәкләш сиясити қаттиқ йүргүзүлгән.

Әгәр 40 яштин төвән қиз-чоканларниң яғлиқ артқанлиқи байқалса, уларниң дохтурханиға кириши чәклинип, җәриманә қоюлидикән.

У йоллиған учурларға қариғанда йәнә, нөвәттә шаяр йезиси тәвәсидә оқутқучиларниң бурутини чүшүрүш бәлгилимиси қаттиқ йүргүзүлгән. Әгәр оқутқучиларниң бурут қойғанлиқи байқалса, дәрһал чүшүрүветишкә мәҗбурлинидикән.

Шаяр наһийиси қайлор йезилиқ оттура мәктәптики икки яш оқутқучи бурутини чүшүрмигәнлики үчүн һөкүмәтниң тәнқидигә учриған. Даириләр шу сәвәбтин мәзкур “мәктәптики һәр бир оқутқучиға 5 миң йүәндин җәриманә қойимиз, мудирни хизмәттин һәйдәймиз” дәп тәһдит салғандин кейин бу оқутқучилар бурутлирини алдурушқа мәҗбур болған. Әмма вәқәниң қачан болғанлиқи һазирчә намәлум.

Өткән ай ақсуниң бир қисим җайлирида зәнҗирсиман партлитиш вәқәлири йүз бәргән. Мәлум болушичә, бу вәқәгә 17 киши четилған. Гумандарлардин дин 6 киши хитай аманлиқ күчлири тәрипидин етип ташланған, 6 киши партлап һаятидин айрилған, қалған 5 киши қолға елинған.