“шаңхәй һәмкарлиқ тәшкилати 2023-йиллиқ саяһәт йили мунбири” уйғур районида башланди

Вашингтондин мухбиримиз җәвлан тәйярлиди
2023.11.24

Хитайниң “тәңритағ тори” вә “шинҗаң гезити” ториниң 24-ноябир күнидики хәвиригә қариғанда, “шаңхәй һәмкарлиқ тәшкилати 2023-йиллиқ саяһәт йили мунбири” ниң ечилиш мурасими 24-ноябир күни “шинҗаң хәлқара көргәзмә зали” да башланған.

 Хәвәрдә ейтилишичә, уйғур районлуқ аптоном һөкүмәт билән шаңхәй һәмкарлиқ тәшкилати катибат башқармиси бирликтә уюштурған бу йиғинда “шаңхәй һәмкарлиқ тәшкилатиға әза дөләтләрдики саяһәт бошлуқи” темиси муһакимә қилиниду. Бу йиллиқ йиғинниң ечилиш мурасимиға аптоном районлуқ партком секретари ма шиңрүй, һөкүмәт рәиси әркин тунияз, шаңхәй һәмкарлиқ тәшкилати баш катипи җаң миң, шундақла қазақистан, қирғизистан, иран, пакистан, өзбекистан, белорусийә қатарлиқ дөләтләрниң саяһәт вә тәнтәрбийә министирлири қатнишип сөз қилған.

Ма шиңрүй, әркин тунияз қатарлиқлар ечилиш нутқида қилған сөзидә, шаңхәй һәмкарлиқ тәшкилатиниң оттура асия дөләтлири билән болған хәлқара мунасивәтләрдә “шинҗаңға күчлүк арқа тирәк болғанлиқи вә шинҗаңниң тәрәққиятиға зор күч билән ярдәм бәргәнлики” ни мәдһийәлигән. Арқидинла ши җинпиңниң “бир бәлбағ бир йол” тәшәббуси йолға қоюлған 10 йилдин буян шаңхәй һәмкарлиқ тәшкилатиға әза дөләтләр билән болған һәмкарлиқ, җүмлидин “шинҗаң саяһәтчилики” ни оттура асияға вә хәлқараға йүзләндүрүшниң барғанчә чоңқурлишиватқанлиқини, “шинҗаң яхши җай” дегән алтун маркини пүтүн дуняға тонутушқа шараит һазирлиниватқанлиқини махтиған.

“шаңхәй һәмкарлиқ тәшкилати” ға әза яки көзәтчи дөләтләрниң министирлириму мәзкур тәшкилатқа әза дөләтләрни асас қилған саяһәтчиликни раваҗландурушниң тәрәққият бошлуқи һәққидә тәклип пикирлирини оттуриға қойған.

Әслидә уйғур райониниң муқимлиқи үчүн һәрбий һәмкарлиқни асас қилип қурулған шаңхәй һәмкарлиқ тәшкилатиниң бүгүнки күндә саяһәтчилик ишлириға арилишип қелиши вә бу арқилиқ “шинҗаң яхши җай” дегән маркини қайта базарға салмақчи болуши хитайниң “бу районда ирқий қирғинчилиқ йоқ, тәрәққият вә гүллиниш барлиққа кәлди” дегән тәшвиқатиниң дипломатик вә кәң даирилик шәкли сүпитидә оттуриға чиқмақта.

Хитай һөкүмити бу йил киргәндин башлапла “шинҗаңда саяһәтчиликни гүлләндүрүш” шамили пәйда қилған болуп, қошна дөләтләр билән бәзи келишимләрни имзалиғаниди. Қазақистандики пешқәдәм зиялий вә паалийәтчи қәһриман ғоҗамбәрди “шинҗаң-оттура асия саяһәт һәмкарлиқ иттипақи” ниң қурулуши һәққидә радийомизға қилған сөзидә, бундақ пиланниң хитайниң оттура асия дөләтлиригә хитай аһалилирини җәлп қилиш, йәрләштүрүш, һәтта оттура асияни хитайлаштуруш пиланиниң бир парчиси икәнликини оттуриға қойғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.