“Shangxey hemkarliq teshkilati 2023-yilliq sayahet yili munbiri” Uyghur rayonida bashlandi

Washin'gtondin muxbirimiz jewlan teyyarlidi
2023.11.24

Xitayning “Tengritagh tori” we “Shinjang géziti” torining 24-noyabir künidiki xewirige qarighanda, “Shangxey hemkarliq teshkilati 2023-yilliq sayahet yili munbiri” ning échilish murasimi 24-noyabir küni “Shinjang xelq'ara körgezme zali” da bashlan'ghan.

 Xewerde éytilishiche, Uyghur rayonluq aptonom hökümet bilen shangxey hemkarliq teshkilati katibat bashqarmisi birlikte uyushturghan bu yighinda “Shangxey hemkarliq teshkilatigha eza döletlerdiki sayahet boshluqi” témisi muhakime qilinidu. Bu yilliq yighinning échilish murasimigha aptonom rayonluq partkom sékrétari ma shingrüy, hökümet re'isi erkin tuniyaz, shangxey hemkarliq teshkilati bash katipi jang ming, shundaqla qazaqistan, qirghizistan, iran, pakistan, özbékistan, bélorusiye qatarliq döletlerning sayahet we tenterbiye ministirliri qatniship söz qilghan.

Ma shingrüy, erkin tuniyaz qatarliqlar échilish nutqida qilghan sözide, shangxey hemkarliq teshkilatining ottura asiya döletliri bilen bolghan xelq'ara munasiwetlerde “Shinjanggha küchlük arqa tirek bolghanliqi we shinjangning tereqqiyatigha zor küch bilen yardem bergenliki” ni medhiyeligen. Arqidinla shi jinpingning “Bir belbagh bir yol” teshebbusi yolgha qoyulghan 10 yildin buyan shangxey hemkarliq teshkilatigha eza döletler bilen bolghan hemkarliq, jümlidin “Shinjang sayahetchiliki” ni ottura asiyagha we xelq'aragha yüzlendürüshning barghanche chongqurlishiwatqanliqini, “Shinjang yaxshi jay” dégen altun markini pütün dunyagha tonutushqa shara'it hazirliniwatqanliqini maxtighan.

“Shangxey hemkarliq teshkilati” gha eza yaki közetchi döletlerning ministirlirimu mezkur teshkilatqa eza döletlerni asas qilghan sayahetchilikni rawajlandurushning tereqqiyat boshluqi heqqide teklip pikirlirini otturigha qoyghan.

Eslide Uyghur rayonining muqimliqi üchün herbiy hemkarliqni asas qilip qurulghan shangxey hemkarliq teshkilatining bügünki künde sayahetchilik ishlirigha ariliship qélishi we bu arqiliq “Shinjang yaxshi jay” dégen markini qayta bazargha salmaqchi bolushi xitayning “Bu rayonda irqiy qirghinchiliq yoq, tereqqiyat we güllinish barliqqa keldi” dégen teshwiqatining diplomatik we keng da'irilik shekli süpitide otturigha chiqmaqta.

Xitay hökümiti bu yil kirgendin bashlapla “Shinjangda sayahetchilikni güllendürüsh” shamili peyda qilghan bolup, qoshna döletler bilen bezi kélishimlerni imzalighanidi. Qazaqistandiki péshqedem ziyaliy we pa'aliyetchi qehriman ghojamberdi “Shinjang-ottura asiya sayahet hemkarliq ittipaqi” ning qurulushi heqqide radiyomizgha qilghan sözide, bundaq pilanning xitayning ottura asiya döletlirige xitay ahalilirini jelp qilish, yerleshtürüsh, hetta ottura asiyani xitaylashturush pilanining bir parchisi ikenlikini otturigha qoyghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.