Kent ahalisi özliri saylighan partiye sékertarini qutuldurush üchün namayish qildi

Muxbirimiz ümidwar
2016-06-19
Share


Xitayning gu'angdong ölkisining luféng shehiri wuken kenti komitétining mudiri lin zulyen 18 - iyun küni yerlik da'iriler teripidin para élish qilmishi artilip, tutup kétilgendin kéyin, 19 - iyun küni 3 mingdin artuq kent ahalisi naraziliq namayishi ötküzüp, özliri saylighan lin zulyenni qoyup bérishni telep qilghan.

Radi'omiz gu'angdong bölümining xewer qilishiche, da'iriler zor sandiki saqchi ewetip, wuken kentini qamal qilghan.

Kent ahalisining namayishi yekshenbe küni chüshtin kéyin bashlan'ghan bolup, da'iriler kent ahalisining yighilish herkitini qamal qilish üchün toluq qorallan'ghan saqchilarni neq meydan'gha ewetkendin sirt yene uchquchisiz ayropilan chiqirip, hawadin namayish ehwalini nazaret qilghan.

Melum bolushiche, buningdin bir qanche kün ilgiri lin zulyen kent ahalisigha uqturush qilip, bu yekshenbe küni yighin échip, yer mesilisi heqqide yuqirigha erz qilish mesilisini muhakime qilmaqchi bolghan idi. Emma u saqchilar teripidin tutup kétilgen.

Emma, yekshenbe küni ghezepke kelgen kent ahalisi lin zulyenning ayalining bashlamchiliqida yighilish ötküzüp, öz sékérétarini qoyup bérish we yerlirini qayturup bérish sho'arini otturigha qoyghan.

Igilinishiche, hetta namayish bashlinishtin igliri kent ahalisi kentke kirmekchi bolghan saqchilarni tosqan we ularning bu yerge kelgen muxbirlarni tutushigha yol qoymay saqchilar bilen tirkeshken iken.

Lin zulyen 2011 - yili, wuken kentide parixor emeldarlarning qanunsiz yer igileshtin ibaret chiriklik qilmishigha qarshi qozghalghan naraziliq herikitidin kéyin, kentte ötküzülgen erkin saylam arqiliq kent ahalisi teripidin partiye guruppa sékértariliq we kent komitétning mudiriliq wezipisige saylan'ghan idi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet