Сәуди әрәбистани вә әрәб бирләшмә хәлипиликини б д т ниң “номуссизлар тизимлики” гә қошуш чақириқи оттуриға қоюлмақта

• Мухбиримиз әзиз
  2019-06-11

Бирләшкән дөләтләр тәшкилати (б д т) һәр йили өсмүр балиларға зорлуқ күчи ишләткән дөләтләр вә қораллиқ гуруппилардин “номуссизлар тизимлики” турғузидиған болуп, баш катип антонйо гутерс йеқинда бу тизимликни елан қилидикән.

Мәлум болушичә, бу тизимлик б д т ниң өсмүрләрни қоғдаштики әң үнүмлүк қораллиридин бири болуп, “номуссиз” дөләтләрни дуняға җакарлаш арқилиқ уларни хәлқи аләмгә шәрмәндә қилидикән.

Алан рок имзасида 9-июн күни “әл җәзирә” торида елан қилинған бу һәқтики мақалида у сәуди әрәбистан вә әрәб бирләшмә хәлипиликини 2019-йиллиқ “номуссизлар тизимлики” гә қошушни чақириқ қилған. Шундақла уларниң йәмәндики миңлиған бигунаһ нарәсидиләрниң өлүп кетишигә биваситә җавабкар икәнликини җанлиқ мисаллар арқилиқ баян қилған.

Дәл мушу мәзгилләрдә сәуди әрәбистани падишаһи салман өзлириниң бир милйон роһинга мусулманлириға иқамәт беридиғанлиқини җакарлиған. Әмма хитай һөкүмитиниң уйғурларни бастуруш һәрикәтлири тоғрисида ғәрб дуняси хитайни қаттиқ әйибләватқанда мусулманлар дунясидики байрақдар дөләтләрдин болған сәуди әрәбистани вә әрәб бирләшмә хәлипилики изчил бу мәсилидин өзини чәткә елип келиватқанлиқи мәлум. Шундақла өзлириниң хитай һөкүмити иҗра қиливатқан “әсәбийликкә вә террорлуққа зәрбә бериш һәрикити” ни қоллайдиғанлиқини билдүрүп кәлгән.