Se'udi erebistani we ereb birleshme xelipilikini b d t ning “Nomussizlar tizimliki” ge qoshush chaqiriqi otturigha qoyulmaqta

• Muxbirimiz eziz
  2019-06-11

Birleshken döletler teshkilati (b d t) her yili ösmür balilargha zorluq küchi ishletken döletler we qoralliq guruppilardin “Nomussizlar tizimliki” turghuzidighan bolup, bash katip antonyo gutérs yéqinda bu tizimlikni élan qilidiken.

Melum bolushiche, bu tizimlik b d t ning ösmürlerni qoghdashtiki eng ünümlük qoralliridin biri bolup, “Nomussiz” döletlerni dunyagha jakarlash arqiliq ularni xelqi alemge shermende qilidiken.

Alan rok imzasida 9-iyun küni “El jezire” torida élan qilin'ghan bu heqtiki maqalida u se'udi erebistan we ereb birleshme xelipilikini 2019-yilliq “Nomussizlar tizimliki” ge qoshushni chaqiriq qilghan. Shundaqla ularning yemendiki minglighan bigunah naresidilerning ölüp kétishige biwasite jawabkar ikenlikini janliq misallar arqiliq bayan qilghan.

Del mushu mezgillerde se'udi erebistani padishahi salman özlirining bir milyon rohin'ga musulmanlirigha iqamet béridighanliqini jakarlighan. Emma xitay hökümitining Uyghurlarni basturush heriketliri toghrisida gherb dunyasi xitayni qattiq eyiblewatqanda musulmanlar dunyasidiki bayraqdar döletlerdin bolghan se'udi erebistani we ereb birleshme xelipiliki izchil bu mesilidin özini chetke élip kéliwatqanliqi melum. Shundaqla özlirining xitay hökümiti ijra qiliwatqan “Esebiylikke we térrorluqqa zerbe bérish herikiti” ni qollaydighanliqini bildürüp kelgen.