Se'udi erebistan hökümiti yene bir Uyghurni tutqun qilghan

• Muxbirimiz erkin
  2022-04-01

Xelq'ara kishilik hoquq teshkilatliri se'udi erebistan hökümitidin tutqundiki hemdulla weli bilen nurmuhemmet rozini xitaygha qayturmasliqqa telep qiliwatqan bir waqitta, ular toghriliq uchur yetküziwatqan yene bir Uyghurnimu tutqun qilghan.

Hemdulla welining türkiyede turushluq perzentlirining radiyomizgha éytishiche, se'udi da'iriliri bu hepte hemdulla we nurmuhemmet toghrisida ulargha uchur yetküziwatqan mekkediki bir kishini tutqun qilip, “Hemmisini chégradin qoghlap chiqirish merkizige qamap qoyghan.”

Hemdulla welining a'ilisidikiler bixeterlik sewebidin özlirige xewer yetküzüp turghan bu kishining ismini ashkarlashni ret qildi. Ularning éytishiche, xelq'ara jem'iyet ularni xitaygha qayturulush xewipidin saqlap qalmisa, ularning qayturulushi waqit mesilisi bolup qalghan iken. Hemdulla weli 2020-yili 2-ayda ‍ömre hej qilish üchün se'udi erebistan'gha bérip, shu yili 11-ayda se'udi da'iriliri teripidin tutqun qilin'ghan. Shu qétim hemdullani mekkediki ‍ijare alghan öyide turghuzghan nurmuhemmet rozi isimlik Uyghurmu, uning bilen teng tutqun qilin'ghan idi.

Hemdullaning perzentliri we se'udi erebistandiki bashqa uchur menbeliri ‍ötken hepte radiyomizgha hemdulla bilen nurmuhemmetning jidde shehiridiki dahban türmisidin riyadqa yötkep kétilgenliki, nurmuhemmetning se'udi erebistanda turushluq guwahnamisi bikar qilin'ghanliqini bildürgen. Se'udi da'irilirining xitay re'isi shi jinping bu yil 5-ayda se'udi erebistanda ziyarette bolidighan bir peytte, Uyghur tutqunlirini chégradin qoghlap chiqirish merkizige yötkishi kishilik hoquq teshkilatlirida endishe qozghighan. Xelq'ara kechürüm teshkilati bu munasiwet bilen bayanat élan qilip, se'udi da'irilirini Uyghurlarni xitaygha qayturmasliqqa chaqirghan.