Se'udi erebistandiki Uyghur tutqunlirining a'ile ezaliri amérika prézidénti baydéndin Uyghurlarni saqlap qélishni telep qilghan

• Muxbirimiz erkin
  2022-07-15

Amérika prézidénti jow baydén 15-iyul se'udi erebistanni ziyaret qilishqa bashlighan bir waqitta, amérikaning s n n tori se'udi erebistanda tutup turuluwatqan Uyghur tutqunlirining mesilisini küntertipke élip keldi. S n n ning xewiride éytilishiche, Uyghur tutqunlirining bashqa döletlerdiki a'ile ezaliri prézidént baydéndin Uyghur tutqunlirini xitaygha qayturulushtin saqlap qélishni telep qilghan.

Xewerde, se'udi erebistanning se'udi puqralirining kishilik hoquqini depsende qilish bilen eyiblinipla qalmay, birqisim Uyghurlarni tutqun qilish we xitaygha ötküzüp bérish bilen eyibliniwatqanliqi, tutqunlardin hemidulla welining qizlirining prézidént baydénni dadisi we tutqundiki qalghan 3 neper Uyghurning xitaygha qayturushtin saqlap qélishqa chaqirghanliqi'i bildürülgen.

Se'udi da'iriliri 2020-yili türkiyedin se'udi erebistan'gha ümre hejge barghan turpanliq diniy zat hemdulla weli, shundaqla hemdulla welini ‍öyide qondurghan se'udi erebistanda olturushluq Uyghurlardin nurmuhemmet rozini tutqun qilghan. Se'udi da'iriliri yene bu yilning bashliri nurmuhemmet rozining burunqi ayali buxelchüm abla bilen uning 10 nechche yashliq qizini tutqun qilip, ularning hemmisi xitaygha qayturush üchün riyadqa yötkep ketkenidi. S n n xewiride buxelchem ablaning riyadqa élip mangghanda tartilghan widiyosinimu élan qildi. Xewerde, shundin béri ulardin héchqandaq xewer élinalmighanliqi bildürülgen.

S n n ning éytishiche, ular bu toghriliq se'udi hökümiti bilen alaqileshken bolsimu, biraq hökümet jawab bermigen. Hemdulla welining qizliridin nuriman weli prézidént baydén'gha qilghan chaqiriqida, birdin-bir ümidning amérikada qalghanliqini bildürüp: “Prézidént baydén se'udi erebistanni ziyaret qilghanda se'udi hökümiti bilen sözliship, ularning gunahsiz ikenlikini éytip, ularni qoyup bérishni telep qilishini soraymiz” dégen.