Шаңхәй һәмкарлиқ тәшкилати хитайниң уйғур елидики тәшвиқат васитисигә айлинип қалмақта

Вашингтондин мухбиримиз ирадә тәйярлиди
2024.02.08

Хитай һөкүмити уйғур елидики сиясәтлирини ақлашқа мунасивәтлик тәшвиқат һәрикәтлирини давам қилмақта.

Йеқинда хитайниң “тәңритағ тори” қатарлиқ хитай һөкүмәт ахбаратлирида шаңхәй һәмкарлиқ тәшкилатиниң муавин баш катипи сохәил хан (Sohail Khan) зиярәт қилинған бир парчә видийолуқ хәвәр тарқалған. Мәзкур видийода хитай риясәтчи сохәил хандин “сиз шинҗаңда зиярәттә болдиңиз, бир қисим ғәрб ахбаратлири ‛хитай шинҗаңда мәдәнийәт қирғинчилиқи қиливатиду‚ дәп ялған ейтиватиду. Сиз буниңға қандақ қарайсиз?” дәп соал сориған.

Сохәил хан буниңға җавабән қилған сөзидә, өзиниң ундақ дәп қаримайдиғанлиқини, чүнки бу йәрдә нурғун уйғур рәһбәрләр билән тонушқанлиқи, бу рәһбәрләрниң “һөкүмәт бекиткән әмәс, бәлки уйғурларниң өзи тәрипидин сайлинип чиқилғанлиқи” ни илгири сүргән. У йәнә өзиниң райондики һәммә милләтләрниң мәдәнийәтлири намаян қилинидиған түрлүк мәдәнийәт паалийәтлиригә иштирак қилғанлиқини ейтип: “бу мәдәнийәт көрәклири хитайдики 56 милләтниң һәммисиниң мәдәнийәт, сиясий вә иқтисадий җәһәттә баравәрликиниң капаләткә игә қилиниватқанлиқидин дерәк бериду. Мән һеч йәрдә мәдәнийәт қирғинчилиқини көрмидим” дегән.

Шаңхәй һәмкарлиқ тәшкилати әслидә уйғур районини өз ичигә алған оттура асия райониниң муқимлиқи үчүн һәрбий һәмкарлиқни күчәйтишни мәқсәт қилип қурулған болсиму, бирақ йеқиндин буян хитай һөкүмитиниң бу тәшкилатни өзиниң уйғур дияридики вәһшийликлирини ақлайдиған тәшвиқат сорунлириға сөрәп кириватқанлиқи көрүлмәктә. Мәлум болушичә, хитай даирилири өткән йили ноябирда “шаңхәй һәмкарлиқ тәшкилати 2023-йиллиқ саяһәт йили мунбири” ниң ечилиш мурасимини “шинҗаң хәлқара көргәзмә зали” да өткүзүп, шаңхәй һәмкарлиқ тәшкилатиға әза дөләтләр билән болған һәмкарлиқ, җүмлидин “шинҗаң саяһәтчилики” ни оттура асияға вә хәлқараға йүзләндүрүшниң барғанчә чоңқурлишиватқанлиқини, “шинҗаң яхши җай” дегән сиясий тәшвиқатни пүтүн дуняға тонутушқа шараит һазирлиниватқанлиқини тәшвиқ қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.