Shawket imin atalmish “Heqsiz kespiy téxnika mektipi” ning ehmiyiti heqqide gep satti

“Shinjang géziti” ning bügünki, yeni 31‏-öktebirdiki sanida “Sotsiyalistik qanun-tüzüm bayriqini égiz kötürüp, térrorluqqa qarshi kürishide qet'iy utup chiqayli” namliq maqale élan qilindi. Mezkur maqale Uyghur aptonom rayonluq xelq qurultiyining mudiri shawket iminning namida élan qilin'ghan.

Maqalide xitay teshwiqatliridiki ilgiriki chaqiriqlar tekrarlinish bilen birlikte aldinqi heptilerde xuddi qorchaq re'isi shöhret zakir tilgha élip ötkendek shawket iminmu nöwette bir milyondin artuq Uyghur solinip yatqan yighiwélish lagérlirini “Heqsiz kespiy téxnika mektipi” dep teswirligen. U bu mekteplerdiki terbiyeleshning qanun boyiche oqutush, insani köyünüsh, örp-adetlerni qoghdash we hörmet qilish asasida dawam qiliwatqanliqini eskertken. Emma radiyomiz yighiwélish lagérliridin téléfon arqiliq igiligen uchurlirida bu atalmish mekteplerge tutqunlarning béshigha qara xalta kiydürülüp élip kélinidighanliqi, yataqtin dersxanigha qoralliq qarawullarning nazaritide élip chiqilidighanliqi, tutqunlarning 24 sa'etning héchyiride bir-biri bilen geplishishke ruxset qilinmaydighanliqi delillen'gen idi.

Shawket imin bügünki bu maqaliside bu mektepler échilghandin buyan köp sandiki kishilerning dölet tilida sözlisheleydighan, oquyalaydighan we yazalaydighan bolghanliqi, ularning kesp-hünerlik bolup qalghanliqi tilgha élin'ghan. Emma maqalide “Terbiyelinip bolghan” bu kishilerning ta hazirghiche néme üchün bireriningmu qoyup bérilmeywatqanliqi heqqide héchqandaq izahat bérilmigen.

Dunya Uyghur qurultiyining bayanatchisi dilshat rishit tünügün “Amérika awazi” radiyosida qilghan sözide xitay da'irilirining yighiwélish lagérlirining mahiyitini dunyadin yoshurush üchün saxta teshwiqatchiliqta wasite tallimaywatqanliqini, hetta uning ichide azab chékiwatqan kishilernimu ékran'gha chiqip yalghan sözleshke, yeni xitay dölitini maxtashqa mejburlawatqanliqini ilgiri sürdi.