Shi jinpingning en'gliye ziyariti kishilik hoquq organlirining küchlük tenqidige uchridi

En'gliyening xitay dölet re'isi shi jinpingni qizghin kütüwélishi xelq'aradiki kishilik hoquq organlirining küchlük tenqidige duchar boldi. Ziyaretning tunji küni en'gliyede xitay hökümitige qarshi keng kölemlik namayishlar ötküzüldi.

Kishilik hoquqni közitish teshkilati en'gliye shöbisi élan qilghan bayanatida, shi jinping textke olturghandin buyan xitayning kishilik hoquq xatirisining ilgirilep nacharlashqanliqini, lyu shawbo we Uyghur ziyaliysi ilham toxtigha oxshash nurghun tinchliqperwer zatlarning türmige élin'ghanliqini tekitlep, en'gliyening bu mesililerni tilgha élish mejburiyiti barliqini eskertti.

Roytérs agéntliqining xewer qilishiche, bügün yene, en'gliyede ötküzülgen naraziliq namayishliridimu herqaysi kishilik hoquq organliri hem shundaqla Uyghur, tibet we falun'gung herikiti qollighuchiliri sho'ar towlap en'gliyeni kishilik hoquqni tijaretke qurban qiliwetmeslikke chaqirghan. Saqchilar etrapta küchlük bixeterlik tedbirliri alghan.