Shi jinping "5-Iyul qirghinchiliqi" ning xatire künide xitayning Uyghur élidiki qoralliq saqchi qisimigha pexri unwan bergen

Muxbirimiz erkin
2021-07-06
Share

Xitay re'isi jinping "5-Iyul ürümchi qirghinchiliqi" ning 12 yilliq xatire küni xitay merkizi herbiy ishlar komitéti namidin perman élan qilip, xitay qoralliq saqchi qisimining Uyghur élidiki bir alahide urush qilish ottura etritige "Térorliqqa qarshi turushning ‍ötkür qilichi" dep nam bergen.

Xitay taratqulirining xewer qilishiche, shi jinping mezkur permanida Uyghur rayondiki barliq xitay qoralliq qisimlirini bu etrettin öginishke chaqirghan.

Weqedin xewerdar kishilerning éytishiche, qoralliq saqchi qisimlirining mezkur alahide urush qilish etriti 2009-yili 5-‍iyul kéchisi ürümchi tengritagh rayoninng éléktir tokini öchüriwétip, Uyghurlarni qirghin qilishta aktip rol oynighan ‍iken.

Shi jinping permanida bu etretning "Térorluq" qa qarshi turushtiki "Qehrimanliq istili", "Xeterge tewekkül qilip, yéngi dewrdiki inqilabiy eskerlerning qanliq jasaritini yaratqanliqi" ni ilgiri sürgen bolsimu, biraq bu etretning qandaq konkirét bir "Qanliq jasaret" körsetkenlikini tilgha almighan.

Shi jinpingning permani 5-iyul küni dunyaning herqaysiy elliride yashawatqan Uyghurlar keng kölemlik naraziliq pa'aliyetlirini ötküzüp, bu "5-Iyul ürümchi qirghinchiliqi" ning 12 yilliqini xatirligen, shundaqla xitay da'irilirining bu weqediki mes'uliyitini jawabkarliqqa tartishni telep qilghan mezgilde élan qilin'ghan. Xitay hökümiti bu weqede ölgenlerning köp qismining xitaylar bolup, 200 dek adem ölgenlikini ‍ilgiri sürgen bolsimu, emma shahitlar we xelq'aradiki Uyghur teshkilatliri weqede yüzligen Uyghurlarning ‍öltürülgenlikini, minglighan Uyghurlarning ‍iz-déreksiz ghayip qiliwétilgenlikini bildürüp kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet