Isak ston fish: "Shi jinpingni 'prézidént' dep atashqa xatime béreyli!"

Muxbirimiz eziz
2019-08-09
Élxet
Pikir
Share
Print

Xitay hökümiti kishilik hoquq, yer shari siyasiy mesililiri we bashqa sahelerde köplep tenqidlerge uchrawatqanda "Washin'gton pochtisi" gézitining obzorchisi isak ston fish amérika metbu'atlirining xitay re'isi shi jinpingni gherb siyasiyonliri bilen bir qatarda "Prézidént" dep atishini "Qet'iy muwapiq emes" dep körsetti.

Aptor bu mesilini tekitleshte "Prézidént" dégen atalghuning shi jinping qollinidighan nam emeslikini, uni "Prézidént" dep atighanda bu emeliyette uning diktatoriliq xaraktérini qanunlashturghan'gha barawer bolup qalidighanliqini alahide tekitleydu. Shuning bilen birge xitayning dölet tüzülmiside prézidéntliq qurulmining mewjut emeslikini körsitidu.

Aptorning bayan qilishiche, shi jinpingning üch xil ataq nami bar iken. Uning deslepki ikkisi, yeni "Xitay kompartiyesi merkiziy komitétining bash sékrétari" we "Merkiziy herbiy ishlar komitétining re'isi" dégenler herqachan alahide gewdilendürüp teshwiq qilinidu. "Dölet re'isi" dégen üchinchi namda arilap-arilap közge chéliqidu. Halbuki, xitay axbarat wasitiliri "Dölet re'isi" dégen bu ataqni gherb dunyasigha herqachan "Prézidént" dep terjime qilidu. Emma amérikada héchkim donald trampni "Amérika re'isi donald tramp" dep chaqirmighinidek xitayda héchkim shi jinpingni "Prézidént (zongtong) shi jinping" dep chaqirmaydu. Emma shundaq bolsimu hazir xitay hökümitining in'glizche "Xelq géziti" we "Shinxu'a agéntliqi" arqiliq tarqatqan uchurlirida shi jinpingni "Prézidént" dep atiwalghanliqtin dunya bankisi, birleshken döletler teshkilati, aqsaray qatarliq dunyawi orunlarning bayanatliridimu shi jinping "Prézidént" dep atiliwatidu. Shuningdek amérika prézidénti donald trampmu mushu xildiki xata ataqni köp qétim qollan'ghan. Mesilen, "Prézidént shi jinping bilen könglimiz yéqin, eger u mundaq qilmisa men mundaq qilimen" dégendek jümlilerni u köp qétim ishletken. Aptor mushu ehwallarni omumlashturup "Shexsen menmu mushu xildiki xata ataqni köp qétim ishlitiptikenmen. Emdi biz buninggha xatime bérishimiz lazim" deydu.

Aptor axirida bu xildiki xata terjimining tolimu ziyanliq ikenlikini tekitlep "Bu nam dawamliq mushundaq qollinilsa aqiwette béyjingning oxshash bir hadisini ikki xil waryantta chüshendürüshige yol échip bergenlik bolidu" dep körsitidu. Yeni xitay ichide "Bash sékrétar" dep atiliwatqan bu kishi diktatoriliqni dawam qiliwerse, xelq'arada "Prézidént" dep tonulghan shi jinping dunyawi sorunlarda yersharilishish, échiwétish we erkin soda dégendek témilarda wezxanliq qilalaydu. Yene bir yaqtin özini "Prézidént" dep atiwalghan diktatorlardin wiladimir putén'gha oxshash kishiler mushu ataq arqiliq özlirining démokratik ellerdikige oxshash az bir qisim öktichilerning qarshiliqigha qarita mutleq köp xelqning saylishi bilen hoquqni qolgha alghanliqini ishare qilalaydu. Xitaydin zor derijide démokratik bolghan rusiyening rehbirini "Prézidént" dep atash toghra bolmighan yerde xitaydek dunyadiki eng tipik diktatoriliq asasidiki hakimiyetning rehbirini "Prézidént" dep atash téximu toghra bolmaydu.

Isak ston fish mushu ehwallargha qarap "Méningche, biz shi jinpingni 're'is' dep atisaq eng muwapiq. Chünki xitayda uni shundaq ataydu" dep körsitidu hemde dunyadiki herqaysi axbarat wasitilirini ilgiriki ataq xatasini onglashqa chaqiridu.

Toluq bet