Массимо интровийн: "ши җинпиң немә үчүн кишилик һоқуққа қарши?"

Мухбиримиз әзиз
2021-09-07
Share

Ши җинпиң һакимийәт бешиға чиққандин кейин түрлүк зулумларниң юқири пәллигә чиққанлиқи көпләп мәлум болған иди. "зимистан" журнилиниң 7-сентәбир елан қилған обзор мақалисидә италийәлик җәмийәтшунас, мәзкур журналниң баш муһәррири массиму интровийн өз қарашлирини оттуриға қоюп, ши җинпиңниң немә үчүн кишилик һоқуқ мәсилилиригә қарши икәнликини шәрһлиди.

Апторниң баян қилишичә, ғәрб дунясидики нурғун кишиләр ортақ садир қиливатқан бир хаталиқ уларниң ши җинпиң һәққидики чүшәнчисиниң инглизчиға тәрҗимә қилинған ши җинпиң әсәрлирини мәнбә қилғанлиқта икән. Чүнки ши җинпиңниң әң негизлик идийәлири әмәлийәттә пәқәт хитайчидила елан қилинған болуп, хитайчә билмәйдиған ғәрпликләр буни оқуш вә чүшиниш имканийитидин мәһрум икән.

Хитай мәркизи һөкүмити башқурушидики "хәлқ тори" да 2-сентәбир күни елан қилинған "ши җинпиңниң йеңи дәврдики хитайчә алаһидиликкә игә сотсиялизм идийәси һәққидә соал-җаваб" темисидики чатма мақалида "биз немә үчүн ғәрб дунясиниң аталмиш ‹дуняви қиммәт чүшәнчиси'гә қарши турушимиз лазим?" дегән соалға җаваб берилгән. Ши җинпиңниң җавабида "бу йәрдики ‹әркинлик', ‹демократийә' вә ‹кишилик һоқуқ' дегәнләр ғәрб буржуазийәсиниң тәшәббуслири. Шуңа биз униңға қарши туримиз" дейилгән.

Ши җинпиңниң қаришичә, марксизмлиқ чүшәнчә бойичә инсанийәт тарихи бирнәччә басқучқа бөлинидиған болуп "феодалларниң зулмәтлик дәври" буржуазийә инқилаби арқилиқ пачақлап ташланған. Әмди бу хил "буржуазийә әркинлики" ни марксизм асасидики сотсиялизм җәзмән мәғлуп қилиши лазим икән. Чүнки "әркинлик", "демократийә" вә "кишилик һоқуқ" дегәнләр әйни вақитта феодализмни ағдуруп ташлашта тарихий рол ойниған. Әмма кейинки вақитлардики сотсиялизм басқучиға кәлгәндә бу чүшәнчиләр "сәлбий" амилларға айлинип қалған. Чүнки буржуазийә мушу "гүзәл" шоарлар арқилиқ өзлириниң капиталистик һөкүмранлиқини сақлап қелишниң койида болмақтикән. Йәнә келип һазирқи күндә америка башчилиқидики хәлқаралиқ буржуазийә системиси мушу шоарлар арқилиқ дуняни қаймуқтуруп кәлмәктикән.

Аптор ши җинпиңниң әнә шу хилдики түп "марксизмлиқ" чүшәнчисини шәрһләш арқилиқ униң бундин кейин "әркинлик", "демократийә" вә "кишилик һоқуқ" дегән саһәләргә һәргизму қәдәм басмайдиғанлиқини алаһидә тәкитләйду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт