Massimo introwiyn: "Shi jinping néme üchün kishilik hoquqqa qarshi?"

Muxbirimiz eziz
2021-09-07
Share

Shi jinping hakimiyet béshigha chiqqandin kéyin türlük zulumlarning yuqiri pellige chiqqanliqi köplep melum bolghan idi. "Zimistan" zhurnilining 7-séntebir élan qilghan obzor maqaliside italiyelik jem'iyetshunas, mezkur zhurnalning bash muherriri massimu introwiyn öz qarashlirini otturigha qoyup, shi jinpingning néme üchün kishilik hoquq mesililirige qarshi ikenlikini sherhlidi.

Aptorning bayan qilishiche, gherb dunyasidiki nurghun kishiler ortaq sadir qiliwatqan bir xataliq ularning shi jinping heqqidiki chüshenchisining in'glizchigha terjime qilin'ghan shi jinping eserlirini menbe qilghanliqta iken. Chünki shi jinpingning eng négizlik idiyeliri emeliyette peqet xitaychidila élan qilin'ghan bolup, xitayche bilmeydighan gherplikler buni oqush we chüshinish imkaniyitidin mehrum iken.

Xitay merkizi hökümiti bashqurushidiki "Xelq tori" da 2-séntebir küni élan qilin'ghan "Shi jinpingning yéngi dewrdiki xitayche alahidilikke ige sotsiyalizm idiyesi heqqide so'al-jawab" témisidiki chatma maqalida "Biz néme üchün gherb dunyasining atalmish 'dunyawi qimmet chüshenchisi'ge qarshi turushimiz lazim?" dégen so'algha jawab bérilgen. Shi jinpingning jawabida "Bu yerdiki 'erkinlik', 'démokratiye' we 'kishilik hoquq' dégenler gherb burzhu'aziyesining teshebbusliri. Shunga biz uninggha qarshi turimiz" déyilgen.

Shi jinpingning qarishiche, marksizmliq chüshenche boyiche insaniyet tarixi birnechche basquchqa bölinidighan bolup "Fé'odallarning zulmetlik dewri" burzhu'aziye inqilabi arqiliq pachaqlap tashlan'ghan. Emdi bu xil "Burzhu'aziye erkinliki" ni marksizm asasidiki sotsiyalizm jezmen meghlup qilishi lazim iken. Chünki "Erkinlik", "Démokratiye" we "Kishilik hoquq" dégenler eyni waqitta fé'odalizmni aghdurup tashlashta tarixiy rol oynighan. Emma kéyinki waqitlardiki sotsiyalizm basquchigha kelgende bu chüshenchiler "Selbiy" amillargha aylinip qalghan. Chünki burzhu'aziye mushu "Güzel" sho'arlar arqiliq özlirining kapitalistik hökümranliqini saqlap qélishning koyida bolmaqtiken. Yene kélip hazirqi künde amérika bashchiliqidiki xelq'araliq burzhu'aziye sistémisi mushu sho'arlar arqiliq dunyani qaymuqturup kelmektiken.

Aptor shi jinpingning ene shu xildiki tüp "Marksizmliq" chüshenchisini sherhlesh arqiliq uning bundin kéyin "Erkinlik", "Démokratiye" we "Kishilik hoquq" dégen sahelerge hergizmu qedem basmaydighanliqini alahide tekitleydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet