En'gliye ishchilar partiyesi rehbiri shi jinpingning aldigha kishilik hoquq mesilisini qoyghan

En'gliye ishchilar partiyesining rehbiri jerimiy korbin xitay re'isi shi jinping bilen körüshkende kishilik hoquq mesilisini tilgha alghan.

Ishchilar partiyesining seyshenbe küni élan qilghan bayanatida körsitishiche, korbin padishah élzabét 2-ning bukinham sariyida shi jinpinggha bergen ziyapitide xitay re'isi bilen körüshüp, uning aldigha kishilik hoquq, xitayning erzan bahaliq sana'et mehsulatlirining en'gliye métallurgiye sana'itige körsitiwatqan tesiri qatarliq mesililerni qoyghan.

En'gliye hökümitining shi jinpingni daghdughiliq kütüwélip, kishilik hoquq mesilisidin özini qachurushi öktichi partiye, kishilik hoquq pa'aliyetchilirining qattiq tenqidige uchrighan.

En'gliye parlamént ezasi fabyan jinping london'gha yétip kélish harpisida rehime mexmut qatarliq Uyghur, tibet, xitay pa'aliyetchilirige, kishilik hoquq teshkilatlirining wekillirige chüshlük “Gheyriy resmiy dölet ziyapiti” bergen.

Bash wezir deywid kamiron kishilik hoquqqa sel qarash bilen tenqidlen'gen bolsimu, biraq u charshenbe küni “Xitay bilen küchlük iqtisadiy, soda munasiwet bolmay turup, uning bilen kishilik hoquq mesiliside “Dostane” muzakire élip barghili bolmaydighanliqini bildürgen.

Ishchilar partiyesining bayanatida yene, korbinning shi jinping bilen en'gliye-xitay munasiwitining tarixiy, hawa kilimat özgirishi qatarliq mesililerde pikir almashturghanliqini bildürdi.