Xitayda yüz bergen namayishlardin kéyin shi jinping se'udi erebistanigha barghan
2022.12.08
Ürümchide yüz bergen ot apiti we xitayning qamal siyasitige qarshi namayishlar dunyaning diqqet nuqtisigha aylan'ghan bir waqitta, xitay kompartiyesining bash sékritari shi jinping se'udi erebistanigha ziyaretke barghan.
“Yaponiye xewerliri” torining 8-dikabir künidiki xewiride “Shi jinping xitayda yüz bergen namayishning tesirini bashqa yaqqa burash üchün se'udi erebistan ziyaritini bashlidi” déyilgen.
Bu xewerde bildürülüshiche, xitay hökümiti bu ziyaret resmiy bashlan'ghiche uni élan qilmighan. Xitaydiki namayishlar, shi jinpingni texttin chüshüshke chaqirishlar uninggha melum bésim we tehdit shekillendürgen bolushi mumkin iken. Eger u bu qétimliq ziyaretke barmisa, “Aq qeghez inqilabi” din qorqup talagha chiqalmighan bolup qalidiken-de, namayishning téximu uzaq sozulushigha medet bergen bolup qalidiken.
7-Dikabir küni se'udi erebistan'gha barghan shi jinping, bu yerdiki töt künlük ziyaritini bashlighan. Bu jeryanda u tunji nöwetlik xitay-ereb elliri rehberliri yighini we xitay-déngiz qoltuqi hemkarliqi komitéti yighinigha qatnishidiken hemde se'udi erebistanning padishahi salman we weli ehdisi muhemmed bin salman bilen körüshüp, se'udidin téximu köp néfit élish, dron (ademsiz ayropilan) sétish we bashqa istratégiyelik menpe'etler üstide kélishim tüzidiken.
Xewerde tehlil qilinishiche, se'udi erebistan shi jinpingni bir nechche kün katta kütiwélish arqiliq özining köp qutupluq dunyagha, yeni amérikadin bashqa xitayghimu muhtaj ikenliki heqqide signal bermekchi bolghan.