Amérika shimaliy atlantik ehdi teshkilatidiki shérikliri bilen xitay tehditige ortaq taqabil turushni közlimekte

Muxbirimiz irade
2021-03-25
Share

Amérika tashqi ishlar ministiri bilinkén shimaliy atlantik okyan ehdi teshkilatidiki ittipaqdashlirini "Tajawuzchiliq we mejburlash xaraktéridiki" xitaygha birlikte taqabil turushqa chaqirghan.

Antoniy billinkén 24-mart charshenbe küni biryussélda shimaliy atlantik ehdi teshkilati tashqi ishlar ministirliri bilen uchrashqandin kéyin muhim nutuq sözligen. U nutqida xitay tehditi üstide nuqtiliq toxtilip, amérikaning shimaliy atlantik okyan ehdi teshkilati, yeni natodiki ittipaqdashliri bilen birlikte xitayning tajawuzchiliq qilmishlirigha ortaq taqabil turidighanliqini bildürgen.

Bilinkén sözide "Shübhisizki, xitayning mejburlash herikiti bizning kolléktip bixeterlikimiz we güllinishimizge tehdit séliwatidu, shundaqla u xelq'ara sistémining qa'idisi shundaqla biz we ittipaqdashlirimizgha ortaq bolghan qimmet qarashlirimizni nezerdin saqit qilish üchün aktipliq bilen heriket qiliwatidu" dégen.

U sözi dawamida, xitayning Uyghurlargha qiliwatqan jinayetlirini eyiblep xitaygha jaza tedbiri élan qilin'ghandin kéyin, xitayning yawropa ittipaqigha öch élish xaraktérlik jaza tedbiri élan qilghanliqinimu tilgha élip turup, "Béyjingning öch élish jazasi bizning birleshkendila andin mustehkem bolidighanliqimizni körsitip béridu, eger undaq qilalmisaq, biz xitaygha jazalirining ishqa yaraydighanliqini bildürgen bolup qalimiz" dégen.

Bilinkén sözide xitayning déngiz seper erkinlikini cheklishi, jenubiy déngizni herbiyleshtürüshi, hindi-ténch okyandiki herqaysi döletlerni nishanlishi we shundaqla Uyghurlargha qaritiwatqan zulumi qatarliq muhim mesililer üstide birmu-bir toxtalghan.

Birleshme agéntliqining xewer qilishiche, shu küni yene, shimaliy atlantik ehdi teshkilatining bash katipi jins stolténbérg "Nato xitayni düshmen dep qarimaydu, emma xitayning qed kötürüshi bizning bixeterlikimizge biwasite tesir körsitidu. Téximu muhimi, xitay bizning qimmet qarishimizni ortaqlashmaydighan dölet. Biz ularning xongkongdiki démokratik namayishni qandaq bir terep qilghanliqini, ularning öz döliti ichidiki Uyghurlarni qandaq basturuwatqanliqini, shundaqla ularning qandaq qilip qanun asasidiki xelq'ara tertiplerge buzghunchiliq qiliwatqanliqini körüwatimiz" dégen.

Közetküchilerning qarishiche, nato yighinida Uyghurlarning mesilisining tilgha élinishi muhim ehmiyetke ige iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet