Шималий атлантик әһдә тәшкилати тунҗи қетим хитайниң тәһдиткә айланғанлиқини етирап қилди

Мухбиримиз әркин
2019-12-04
Share

Шималий атлантик әһдә тәшкилати 4‏-декабир күни тунҗи қетим хитайниң өзлиригә "хирис" пәйда қиливатқанлиқини етирап қилған.

Фирансийә агентлиқиниң хәвәр қилишичә, шималий атлантик әһдә тәшкилатиниң баш катипи җинс столтенберг, хитайниң барғансери ешип бериватқан һәрбий күчи, җүмлидин униң башқурулидиған бомбилириниң явропа вә америкиға йетип баралайдиғанлиқини билдүрүп, униң иттипақдаш дөләтләр ортақ тақабил турушқа тегишлик бир хирисқа айланғанлиқини илгири сүргән. У: "хитай дунядики 2-чоң һәрбий хам чотқа игә дөләт, у йеқиндин бери өзиниң нурғун йеңи вә заманиви иқтидарини намаян қилмақта. Бу, униң явропа вә америкиға йетип баралайдиған узун мусапилик башқурулидиған бомбилирини өз ичигә алиду" дегән.

Шималий атлантик әһдә тәшкилатиға әза дөләтләрниң башлиқлар йиғини 3‏-декабир күни әнглийә пайтәхти лондонда башланған. Мәзкур сиясий‏-һәрбий иттипақниң бу нөвәтлик башлиқлар йиғини униң қурулғанлиқиниң 70 йиллиқиға тоғра кәлгән. Шу мунасивәт билән мәзкур тәшкилатқа әза 29 дөләтниң рәһбәрлири бу қетим лондонда йәнә униң 70 йиллиқини тәбриклигән.

Фирансийә агентлиқиниң хәвиридә қәйт қилинишичә, шимали атлантик әһдә тәшкилати, йәни натониң 4‏-декабир күни ахирлашқан башлиқлар йиғининиң баянатида, хитай мәсилиси алаһидә тилға елинип, мәзкур тәшкилатқа әза дөләтләрниң хитайға ортақ тақабил туруши керәклики тәкитләнгән. Баянатта: "хитайниң зорийиватқан тәсири вә хәлқара сиясәтлири, һәм пурсәт һәм хирис елип кәлмәктә. Буниңға қарши биз бир иттипақ сүпитидә тәң тақабил турушимиз керәк" дейилгән. Баянатта йәнә, хитайниң тор сүритигә алақидар 5G технологийәсиму тилға елинип, шималий атлантик әһдә тәшкилатиға әза вә униңға шерик дөләтләрниң 5G технологийәсигә көчүштә бихәтәр вә очуқ-ашкара системиларда ишәнч бағлиши керәклики" тәкитләнгән. Илгири президент трамп билән шималий атлантик әһдә тәшкилатиниң явропадики әзалири оттурисида 5G технологийәсигә көчүшкә хитайни қатнаштуруш мәсилиси зор ихтилап пәйда қилған. Германийәниң 5G технологийәсигә көчүштә униң ул әслиһәлиригә хуавей ширкитиниң үскүнилирини ишлитиш пикири президент трампниң қаттиқ қаршилиқиға учрап кәлгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт