Shimaliy atlantik ehde teshkilati tunji qétim xitayning tehditke aylan'ghanliqini étirap qildi

Muxbirimiz erkin
2019-12-04
Share

Shimaliy atlantik ehde teshkilati 4‏-dékabir küni tunji qétim xitayning özlirige “Xiris” peyda qiliwatqanliqini étirap qilghan.

Firansiye agéntliqining xewer qilishiche, shimaliy atlantik ehde teshkilatining bash katipi jins stolténbérg, xitayning barghanséri éship bériwatqan herbiy küchi, jümlidin uning bashqurulidighan bombilirining yawropa we amérikigha yétip baralaydighanliqini bildürüp, uning ittipaqdash döletler ortaq taqabil turushqa tégishlik bir xirisqa aylan'ghanliqini ilgiri sürgen. U: “Xitay dunyadiki 2-chong herbiy xam chotqa ige dölet, u yéqindin béri özining nurghun yéngi we zamaniwi iqtidarini namayan qilmaqta. Bu, uning yawropa we amérikigha yétip baralaydighan uzun musapilik bashqurulidighan bombilirini öz ichige alidu” dégen.

Shimaliy atlantik ehde teshkilatigha eza döletlerning bashliqlar yighini 3‏-dékabir küni en'gliye paytexti londonda bashlan'ghan. Mezkur siyasiy‏-herbiy ittipaqning bu nöwetlik bashliqlar yighini uning qurulghanliqining 70 yilliqigha toghra kelgen. Shu munasiwet bilen mezkur teshkilatqa eza 29 döletning rehberliri bu qétim londonda yene uning 70 yilliqini tebrikligen.

Firansiye agéntliqining xewiride qeyt qilinishiche, shimali atlantik ehde teshkilati, yeni natoning 4‏-dékabir küni axirlashqan bashliqlar yighinining bayanatida, xitay mesilisi alahide tilgha élinip, mezkur teshkilatqa eza döletlerning xitaygha ortaq taqabil turushi kérekliki tekitlen'gen. Bayanatta: “Xitayning zoriyiwatqan tesiri we xelq'ara siyasetliri, hem purset hem xiris élip kelmekte. Buninggha qarshi biz bir ittipaq süpitide teng taqabil turushimiz kérek” déyilgen. Bayanatta yene, xitayning tor sür'itige alaqidar 5G téxnologiyesimu tilgha élinip, shimaliy atlantik ehde teshkilatigha eza we uninggha shérik döletlerning 5G téxnologiyesige köchüshte bixeter we ochuq-ashkara sistémilarda ishench baghlishi kérekliki” tekitlen'gen. Ilgiri prézidént tramp bilen shimaliy atlantik ehde teshkilatining yawropadiki ezaliri otturisida 5G téxnologiyesige köchüshke xitayni qatnashturush mesilisi zor ixtilap peyda qilghan. Gérmaniyening 5G téxnologiyesige köchüshte uning ul eslihelirige xu'awéy shirkitining üskünilirini ishlitish pikiri prézidént trampning qattiq qarshiliqigha uchrap kelgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet