Gé'orgéday stéwart: "Men shinjangda erkinlik heqqide némilerni ögendim"

Muxbirimiz erkin
2019-06-07
Élxet
Pikir
Share
Print

En'gliyelik sayahetchi gérogiday stéwart en'gliyediki "Anxérd" namliq zhurnalda maqale élan qilip, özining bu yil Uyghur rayonigha qilghan wélisipitlik sepiride duch kelgen kashila we awarichiliklirini ashkarilighan.

Gé'orgiday stéwartning ilgiri sürüshiche, u Uyghur rayonigha tewekkülchilik qilishqa barghan bolsimu, lékin chöchek chégrasida 8 sa'et tutup qélinip, tewekkülchilik qilish deydighan bir nersining yoqlighini ögen'gen. U maqaliside "Men sepirimning bu qismida bezi qiyinchiliqlargha uchraydighanliqimni bilettim, shinjang 'bir belwagh bir yol' qurulushining halqiliq tügüni bolupla qalmay, belki yene musulman Uyghurlar on yillardin béri jazalinip kéliwatqan yer idi. Emma men parakendichilikning bundaq éghir bolidighanliqini oylap baqmighan idim" dégen.

Gé'orgéday stéwartning "Men shinjangda erkinlik heqqide némilerni ögendim" namliq maqaliside ilgiri sürüshiche, u chöchekke kélishi bilenla soraqqa tartilip, wélisipiti we pasporti tartiwélin'ghan. Yanfoni we kompyutéri chuwuwétilip, méhmanxana sirtigha chiqishi cheklen'gen. Uning ilgiri sürüshiche, saqchilar we puqrache kiyin'gen xadimlar uning bilen 24 sa'et ichide az dégende 10 qétim "Söhbet" élip barghan. Yérim sa'et ichide 5 qétim pasporti tekshürülgen. U rayonda musulmanlarni tazilashning toxtawsiz dawamlishiwatqanliqi, ürümchide meschitlerning munar we ay yultuzlirining chéqip tashlan'ghanliqi, balilarning diniy isim qoyushning men'i qilin'ghanliqi, mekteblerde Uyghur tilining ghayib bolghanliqi, héyt namizi, ussul oynash, nikah we jinaza murasimi dégendek adetlerning cheklen'genlikini bildürgen.

Uning ilgiri sürüshiche, dunyaning héchqandaq yéride, hetta shimaliy koriyedimu puqralar bunchilik qattiq nazaret qilinmaydiken. U yerde omumyüzlük teqibleshning yolgha qoyulghanliqi, saqchi tekshürmigen teqdirdimu, lékin puqralarni kaméra, yüz tonush apparati, barmaq izini élish mashinilirining teqib qilip turidighanliqini bildürgen. U maqalisining axirida özining qazaqistan'gha ötkende hés qilghanlirini Uyghur rayoni bilen sélishturup, "Men saqchi dölitining teqiblishidin qutulghanda nazaret axirlashqandek tuyuldi. Xitaydin ayrilghandin kéyin bashqa bir istibdatqa uchrimighan we parakendichilik axirlashqan bolsimu, lékin buning ensizlikidin qutulush qiyin'gha toxtidi," dep tekitligen.

Toluq bet