Xitay xelq qurultiyining “Shinjang wekiller ömiki” 6 qanun we 106 teklip layihesi tapshuruwalghan

Washin'gtondin muxbirimiz erkin teyyarlidi
2024.03.04

Xitay memliketlik xelq qurultiyining 14-nöwetlik 2-omumi yighini harpisida, 4-mart küni “Shinjang wekiller ömiki” ning bayanatchisi béyjingda axbarat yighini ötküzüp, atalmish “Shinjang wekiller ömiki” ning bu nöwetlik qurultayda otturigha qoyidighan 6 qanun layihesi we 106 teklip pikir tapshuruwalghanliqini bildürgen. Xitayning hökümet taratquliridin “Tengritagh” ning xewiride qeyt qilinishiche, “Shinjang wekiller ömiki” ning bayanatchisi jaw jyangtaw bu 6 qanun layihesi we 106 teklip pikirning nuqtiliq ishqa orunlishish, qanuni tüzüsh yaki uninggha tüzitish kirgüzüsh, erkin soda sinaq rayoni qanuni qatarliq mesililerge chétishliq ikenlikini bildürgen bolsimu, lékin bu qanun layihesi we teklip pikirlerning konkrét mezmunlirigha chüshenche bermigen.

Xitay xelq qurultiyining ilgiriki memliketlik yighinlirida atalmish “Shinjang wekiller ömiki” ning qurultaygha bergen qanun layiheliri we teklip pikirlirining nuqtiliq Uyghur diyarida “Jungxu'a milliti ortaq éngi” berpa qilish, xitay tili we medeniyitini omumlashturush we dölet hamiyliqidiki emgek küchlirini yötkesh pirogrammilirini qanunlashturushqa merkezleshkenliki melum. Halbuki, bu siyasetler amérika hökümiti we bezi gherb parlaméntliri teripidin “Irqiy qirghinchiliqning parchisi” dep qarilip kelgen, shundaqla dölet hamiyliqidiki Uyghur emgek küchlirini yötkesh pirogrammisi mejburiy emgek, dep békitilip, Uyghurlar ishlepchiqarghan mehsulatlar cheklen'gen yaki bayqut qilinip kélin'genidi. Jaw jyangtawning éytishiche, xitayning bu nöwetlik memliketlik xelq qurultiyi yighinining “Shinjang wekiller ömiki” 60 wekildin teshkil tapqan bolup, xitay, Uyghur, qazaq, tunggan, mongghul, shiwe, özbék, tatar, rus qatarliq 11 milletni öz ichige alghaniken. Halbuki, xitayning hökümet sanliq melumatlirida Uyghurlar Uyghur diyari nopusining texminen %48 ni teshkil qilghan déyilsimu, emma Uyghurlarning 60 kishilik “Shinjang wekiller ömiki” ning aran 3 din 1 qismini teshkil qilishi diqqet qozghimaqta. Xitayning 2017-yili bashlan'ghan chong tutqunida Uyghur diyarining her derijilik hakimiyet organliridiki nurghun Uyghur kadirlirining “Ikki yüzlimichilik” bilen eyiblinip tazilan'ghanliqi melum.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.