Xitay da'iriliri xotende "Shinjanggha yardem bérish xizmet yighini" échip, yéngi nishanlirini tekitlidi

Muxbirimiz sada
2019-07-17
Élxet
Pikir
Share
Print

Xitay hökümitining Uyghurlar diyaridiki basturush siyasiti xelq'araning küchlük tenqidige duch kéliwatqanda xoten shehiride "Shinjanggha yardem bérish yighini" ning échilishi diqqet qozghidi.

"Tengritagh" torining 16-iyuldiki xewirige qarighanda, 14-16-iyulghiche échilghan mezkur yighinda xitay kompartiyesi merkiziy komitéti siyasiy byurosining da'imiy ezasi wang yang "Shinjanggha yardem xizmiti" boyiche "Rayondiki herqaysi milletlerning öz-ara arilishishi, pikir almashturushi we birikishini tézleshtürüshni telep qilghan.

U yene, Uyghur diyaridiki yerlik milletlerning "Ichkiri ölkilerge bérip yughurulushi we rawajlinishi ilgiri sürüsh" ni hem bingtüenning jenubta téximu kéngiyishini alahide tekitligen. Uyghur tehlilchiliri wang yangning bu sözining buningdin kéyin Uyghurlarni köplep ichkiri xitaygha ewetip, orunlashturush arqiliq ularni xitay jem'iyitige singdürüshni meqset qilghanliqini körsitidighanliqini bildürüshti.

Yighinda söz qilghanlarning ichide gu'angdung ölkisining mu'awin ölke bashliqi jang xu "Shinjanggha yardem qilish" xizmitining Uyghur diyarining jem'iyet amanliqi we "Ebediy" eminlikini ishqa ashurushtiki döletning istratégiyelik tedbir ikenlikini alahide otturigha qoyghan.

Xitay hökümiti 19 ölkining Uyghur diyaridiki pa'aliyetlirini "Shinjangdiki xelqning kembighelchiliktin qutulushigha yardem bérish, shinjangning tereqqiyatini ilgiri sürüsh" dep teriplimekte, emma Uyghurlar bolsa, buni "Shinjangning bayliqliri we emgek küchlirini 19 ölkining öz aldigha ayrim-ayrim igiliwélish" dep qarimaqta.

Xitay hökümitining Uyghur diyarining jenubidiki Uyghurlarni atalmish "Yéza éshincha emgek küchi" namida xitayning ichkiri ölkilirige yötkishi köp yillardin buyan dawamlashmaqta idi. Wang yangning sözliri bu ehwalning buningdin kéyin téximu kücheytilidighanliqidin signal béridiken. Emdilikte "Shinjanggha yardem xizmet yighini" ning bu qétim xotende échilishi közetküchilerning diqqitini qozghidi.

Bu qétimqi xitay merkizi hökümitining "Shinjanggha yardem bérish yighini" ikki milyondin artuq Uyghur we bashqa yerlik milletlerning lagérlargha solinip, Uyghurlargha qarita medeniyet, til we ma'arip jehettin xitaychilashturush kücheytiliwatqan, Uyghurlargha qarita yuqiri téxnikiliq qattiq nazaret sistémisi yürgüzülüwatqan, emma xitayning bu qilmishi xelq'ara jem'iyetning qattiq eyiblishige uchrawatqan bir peytte échildi.

Uyghur közetküchiliri mezkur yighinda déyilgen mezmunlargha asasen, xitay da'irilirining buningdin kéyin nishanini asasliqi jenubtiki wilayetlerge qaritip, bu rayondiki Uyghurlarni nopus jehette shalanglashturush, til we medeniyet jehette xitaylashturush, bu rayonlargha bolsa téximu köp xitay ahalilirini orunlashturushni kücheytishi mumkinlikini otturigha qoyushmaqta.

Toluq bet