Közetküchiler: xitay rehberliri "3-Nöwetlik shinjang xizmiti yighini" gha teyyarliniwatqan bolushi mumkin

Muxbirimiz irade
2019-07-12
Élxet
Pikir
Share
Print

"Jenubiy xitay sehiri" gézitining xewer qilishiche, xitay hökümiti yéngi bir nöwetlik atalmish "Shinjang xizmiti yighini" gha teyyarliq qiliwatqan bolushi mumkin iken. Xewerdin qarighanda, yéqindin buyan shinxu'a tori qatarliq bir qatar hökümet metbu'atliri hedep 2014-yili échilghan "2-Nöwetlik shinjang xizmiti yighini" ning 5 yilliqi heqqide xewer tarqitishqa bashlighan. Bu xewerlerde birdek, 2-nöwetlik shinjang xizmiti yighini échilghandin kéyinki bu 5 yil ichide "Közligen netije hasil qilindi" dégen söz köplep ishlitilgen. Shinxu'a özining xewiride yene, "Térrorluq we radikalliqqa qarshi küreshte ghelibe qolgha keltürüldi, ötken 30 ay ichide birmu térrorluq weqesi sadir bolmidi" dégen.

"Jenubiy xitay sehiri" gézitining merkizi partiye mektipidiki oqutquchilarning sözini neqil qilishiche, adette "Melum muddet ichide zor netije qolgha keltürüldi" dégen bu jümlini xitay kompartiye rehberliri melum közligen meqsetke yetken we weziyetke qayta qarap chiqip, lazim bolsa bir qisim siyaset özgirishlirini élip baridighan chaghda qollinidiken. Xitayning hökümet axbarat wasitiliri nöwette bu heqte köplep teshwiqat xewerlirini élan qilishini yéngi bir nöwetlik "Shinjang xizmiti yighini" üchün asas hazirlash, dep qarashqa bolidiken.

Xewerdin qarighanda, yéqindin buyan xitay merkizi hökümitidin yuqiri derijilik emeldarlarning we Uyghur élidiki chén chüen'go bashliq emeldarlarning toxtimay Uyghur élide xizmet tekshürüshide bolmaqtiken. Xitay kompartiyesige meslihetchi bolup ishlewatqan bir qisim tetqiqatchilarmu toxtimay Uyghur élide xizmet ziyaritige bérip, xizmet doklati teyyarlawatqan bolup, mana bularning hemmisi xitay kompartiyesining mushu yil yaz ichide "3-Qétimliq shinjang xizmiti yighini" achidighanliqining alamiti, dep qarashqa bolidiken.

Toluq bet