Shiwétsiye xitayning 2 neper shiwétsiye puqrasini tutqun qilghanliqini qattiq tenqid qildi

Muxbirimiz erkin
2016.01.22

Shiwétsiye tashqi ishlar ministiri margot wolstrom jüme küni xitayning shiwétsiye puqrasi pétir dahlin bilen guy xeymingni tutqun qilghanliqi “Qobul qilinmaydu” dédi.

Wolstrom shiwétsiye axbaratigha bergen bayanatida, “Biz diplomatik qanallar arqiliq buning qobul qilinmaydighanliqini éyttuq. Biz ulargha da'ir uchur bilen teminleshni we ular bilen körüshüshni telep qilimiz” dégen.

Xitay hökümiti buningdin ikki hepte awwal shiwétsiyelik pa'aliyetchi pétir dahlinni tutqun qilip, 19‏-yanwar uni téléwizorgha chiqarghan. Dahlin xitayning merkizi téléwiziye qanilida özining “Xitay qanunigha xilapliq qilghanliqi” ni iqrar qilghan.

Yene bir tutqun shiwétsiye tewelikidiki xongkongluq kitabpurush guy mingxey bolup, umu téléwizorda özining “Jinayiti” ni iqrar qilip, shiwétsiye hökümitidin özining délosigha arilashmasliqni telep qilghan idi.

Margot wolstrom shiwétsiye axbarat wasitilirige qilghan sözide yene, “Ularni téléwizorgha chiqirip, iqrar qildurushtek bundaq xahish pütünley qobul qilinmaydu” dégen.

Xitayning bu herikitige peyshenbe küni amérika inkas qayturghan. Amérika dölet ishlar ministirliqi bayanatchisi mark tonér, u ikki shiwétsiyelik mesilisige diqqet qiliwatqanliqini bildürgen.

Xelq'ara chégrasiz muxbirlar teshkilati peyshenbe küni bayanat élan qilip, yawropa ittipaqini xitayning shinxu'a agéntliqi we merkizi téléwiziye qaniligha émbargo qoyushqa chaqirghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.