Шиветсийә һөкүмити җасуслуқ билән шуғулланған бир хитай мухбирини чеградин қоғлап чиқармақчи болған

Вашингтондин мухбиримиз җәвлан тәйярлиди
2024.04.09

Шиветсийә һөкүмити өткән йили 10-айда җасуслуқ гумани билән тутқан бир хитай мухбирини чеградин қоғлап чиқармақчи болған.

Шиветсийә таратқулиридин “готеборгс почтиси” гезитиниң 8-апрел күнидики хәвиригә қариғанда, шиветсийә хәвпсизлик тармақлири өткән йили 10-айда хитай мухбири чен шөфейни җасуслуқ гумандари дәп тутқан болуп, уни “өткән он йилда шиветсийә дөләт хәвпсизликигә тәһдит пәйда қилған” дәп әйиблигән.

Шиветсийәдики “хитай таратқуси” (KinaMedia)  намлиқ мәтбуат ашкарилиған тәпсилатлардин қариғанда, чен шөфей 20 йил аввал шиветсийәгә көчмән болған,  шивет әргә тегип бир балилиқ болған. У шиветсийәдә чиқидиған “йешил почта” гезитидә мухбир болуп ишләш билән бир вақитта, хитай истихбарат хадимлири билән һәмкарлашқан. У йәнә шиветсийәдики хитай әлчиханиси билән қоюқ барди-кәлди қилған. Чен шөфейниң башқурушидики “йешил почта” гезити әмәлийәттә хитайниң һөкүмәт таратқулири вә  хитай компартийәсиниң шиветсийәдики бирлик сәп бөлүми билән йеқин алақини сақлап кәлгән. Чен шөфей бу гезиттин пайдилинип, “шинҗаң фото сүрәт көргәзмиси” вә башқа мәдәнийәт паалийәтлирини уюштуруп, уйғур районини нуқта қилған көз боямчилиқ тәшвиқати елип барған. У йәнә бу гезит арқилиқ хитай һөкүмитиниң думбиқини челип, “шинҗаңдики террорлуққа қарши күрәш, диний әсәбийликни йоқитиш вә кишилик һоқуқ мәсилиси” гә аит хәвәрләрни тарқатқан.

Хәвәрдә ейтилишичә, шиветсийә һөкүмити 2010-йили хитай “хәлқ гезити” ниң  бир мухбирини җасуслуқ қилмиши билән әйибләп, чеградин қоғлап чиқарған.  Әгәр бу қетим 6 ай қамақта ятқан чен шөфей чеградин қоғлап чиқирилса, шиветсийә-хитай мунасивитигә хели еғир тәсир йетидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.