Shöhret zakir kadirlarni yéza-kentlerge chüshürüp muqimliqni qoghdashtek "Féngchyaw tejribisi" ning dawamliq yolgha qoyulidighanliqini bildürgen

Muxbirimiz erkin
2020-01-06
Élxet
Pikir
Share
Print

Uyghur aptonom rayonining re'isi shöhret zakir 6‏-yanwar küni aptonom rayonluq 13‏-nöwetlik xelq qurultiyining 3‏-qétimliq yighinida xizmet doklati bérip, kadirlarni yéza-kentlerge chüshürüp muqimliqni qoghdashtek "Féngchyaw tejribisi" ning dawamliq yolgha qoyulidighanliqini bildürgen.

Uning tekitlishiche, nöwette rayonda yolgha qoyuluwatqan "Térrorluq" qa qarshi turup, muqimliqni qoghdash siyasiti da'imilashturulidiken. Chet'ellik analizchilar uning sözi xitayning hazirqi qattiq qol siyasitining dawamlishidighanliqini körsitidu, dep qarimaqta.

Shöhret zakir bu sözlerni xitayning 2017‏-yili bashlan'ghan chong tutqunida 3 milyondek Uyghur, qazaq we bashqa musulmanlarni yighiwélish lagérlirigha qamishi xelq'araning qattiq eyiblishige uchrap, chén chüen'go, shöhret zakir qatarliq xitay emeldarlirini jawabkarliqqa tartish sadasi küchiyiwatqan mezgilde qilghan. Shöhret zakirning ismi amérika dölet mejlisi ezalirining ötken yili hökümet emeldarlirigha yazghan Uyghurlar heqqidiki mektupida tilgha élin'ghan. Mektupta chén chüen'go, ju xeylun, sün jinlong, xu lyenxé qatarliqlarni jazalash telep qilin'ghan idi.

Shöhret zakir xizmet doklatida "Shinjang jem'iyitining omumi weziyitining yaxshi ikenliki, 3 yil mabeynide héchqandaq zorawanliq we térrorluq weqesi yüz bérip baqmighanliqini bildürüp, "Pütün rayonda térrorluqqa qarshi muqimliqni qoghdashni da'imilashturush dawamliq yolgha qoyulidu. Shinjangni muqimlashturush, shinjangni qurush siyasiti uzun mezgil dawamlashturulup, uzun mezgillik, omumyüzlük muqimliqqa kapaletlik qilinidu" dégen.

Uning tekitlishiche, ilgiri mezkur rayonda yolgha qoyulghan kadirlarni yéza-kentlerge chüshürüp, muqimliqni qoghdaydighan "Féngchyaw tejribisi" dawamliq yolgha qoyulidiken. "Féngchyaw" jéjyang ölkisining ningbo shehirige qarashliq bir bazarning ismi bolup, kompartiye 1960‏-yillirida mezkur bazardiki "Ammini qozghap, sinipi düshmenlerge qarshi diktatoriliq élip barghan." bu usul kompartiye tarixida "Féngchyaw tejribisi" dep atalghan idi.

D u q ning bayanatchisi dilshat réshit 6‏-dékabir radiyomizda shöhret zakirning sözini tenqidlep, "Uning doklatta 'féngchyaw tejribisi' ning alahide tilgha élishi Uyghurlargha ochuq-ashkara urush élan qilghanliqtur," dédi.

Toluq bet