Шөһрәт закир “террорлуққа қарши күрәш” ниң давамлишидиғанлиқини билдүрди

Уйғурлар диярида давам қиливатқан бастуруш сиясити һәққидә хәлқара җамаәтниң күчлүк инкаслири оттуриға чиқиватқанда хитай һөкүмитиниң бу тәдбирләрни техиму қаттиқ иҗра қилмақчи болуватқанлиқи уйғур аптоном районлуқ һөкүмәтниң рәиси шөһрәт закирниң доклатида йәнә тәкитләнди.

“хитай күндилик хәвәрлири” ториниң 14-январдики хәвиридә ейтилишичә, шу күни ечилған уйғур аптоном районлуқ хәлқ қурултийиниң 13-нөвәтлик 2-омумий йиғинида һөкүмәт рәиси шөһрәт закир хизмәт доклатини оқуп өткән. Доклатта у “иҗтимаий муқимлиқ хизмитиниң, террорлуққа қарши тәдбирләрниң узун мәзгил давам қилидиғанлиқиға идийәмиздә вә әмәлийитимиздә тәйярлиқ көрүшимиз лазим” дегән.

Хәвәрдә ейтилишичә, шөһрәт закир доклатида 1990-йиллардин буян террорлуқ, әсәбийлик вә бөлгүнчиликниң көплигән зораванлиқ вәқәлирини пәйда қилғанлиқини, шу сәвәбтин мәркизий һөкүмәтниң “иҗтимаий муқимлиқ вә узақ мәзгиллик әминлик” ни район хизмитиниң ядроси қилип бекиткәнликини алаһидә тәкитлигән. У мухбирларға қилған сөзидә: “һазир шинҗаңниң вәзийити муқим. Террорлуқ вә муқимлиқ хизмити зор утуқларға еришкәнликтин һазир барлиқ әһваллар һөкүмәтниң контроллуқида болмақта” дегән.

Һалбуки, хәлқара җамаәт хитайниң “террорлуқ” ни баһанә қилип милйонлиған уйғурни лагерларға қамивелишини, җүмлидин “террорлуқ” билән қилчә алақиси болмиған миңлиған уйғур сәрхиллирини тутқун қилишини “террорлуқ баһанисидә уйғурларни йоқитишни қәстлигәнлик” дәп тәнқид қилип кәлмәктә. Шундақла хитай һөкүмитиниң милйонларчә уйғурни қамивелиш бәдилигә аталмиш “иҗтимаий муқимлиқ” бәрпа қилишини “тарихта мисли көрүлмигән етник тазилаш” дәп тәриплимәктә.