Shöhret zakir “Térrorluqqa qarshi küresh” ning dawamlishidighanliqini bildürdi

• Muxbirimiz eziz
  2019-01-15

Uyghurlar diyarida dawam qiliwatqan basturush siyasiti heqqide xelq'ara jama'etning küchlük inkasliri otturigha chiqiwatqanda xitay hökümitining bu tedbirlerni téximu qattiq ijra qilmaqchi boluwatqanliqi Uyghur aptonom rayonluq hökümetning re'isi shöhret zakirning doklatida yene tekitlendi.

“Xitay kündilik xewerliri” torining 14-yanwardiki xewiride éytilishiche, shu küni échilghan Uyghur aptonom rayonluq xelq qurultiyining 13-nöwetlik 2-omumiy yighinida hökümet re'isi shöhret zakir xizmet doklatini oqup ötken. Doklatta u “Ijtima'iy muqimliq xizmitining, térrorluqqa qarshi tedbirlerning uzun mezgil dawam qilidighanliqigha idiyemizde we emeliyitimizde teyyarliq körüshimiz lazim” dégen.

Xewerde éytilishiche, shöhret zakir doklatida 1990-yillardin buyan térrorluq, esebiylik we bölgünchilikning köpligen zorawanliq weqelirini peyda qilghanliqini, shu sewebtin merkiziy hökümetning “Ijtima'iy muqimliq we uzaq mezgillik eminlik” ni rayon xizmitining yadrosi qilip békitkenlikini alahide tekitligen. U muxbirlargha qilghan sözide: “Hazir shinjangning weziyiti muqim. Térrorluq we muqimliq xizmiti zor utuqlargha érishkenliktin hazir barliq ehwallar hökümetning kontrolluqida bolmaqta” dégen.

Halbuki, xelq'ara jama'et xitayning “Térrorluq” ni bahane qilip milyonlighan Uyghurni lagérlargha qamiwélishini, jümlidin “Térrorluq” bilen qilche alaqisi bolmighan minglighan Uyghur serxillirini tutqun qilishini “Térrorluq bahaniside Uyghurlarni yoqitishni qestligenlik” dep tenqid qilip kelmekte. Shundaqla xitay hökümitining milyonlarche Uyghurni qamiwélish bedilige atalmish “Ijtima'iy muqimliq” berpa qilishini “Tarixta misli körülmigen étnik tazilash” dep teriplimekte.