Shöhret zakirdin kéyin chén chüen'gomu xotenni ziyaret qilip namratliqni tügitishni tekitlidi

Uyghur aptonom rayoni partkomning sékrétari chén chüen'go Uyghur élidiki lagér tüzümining zerbisige eng éghir uchrighan wilayetlerdin bolghan xoten wilayitide tekshürüshte bolghan.

Xitayning tengritagh tori qatarliq taratquliridin melum bolushiche, u mushu ayning 6-künidin 7-künigiche xoten wilayitining xoten shehiri, xoten nahiyesi, qaraqash, chira, lop we guma nahiyeliride tekshürüshte bolghan.

U bu jeryanda xotendiki chong-kichik karxanilarni, mektep we yeslilerni we Uyghurlarning öylirini ziyaret qilghan. Uning bu qétimliq ziyaritining bash témisi xotenning namratliq mesilisini hel qilish iken. Xewerdin melum bolushiche, chén chüen'go xotendiki bir qanche yuqiri we ottura derijilik téxnikaliq terbiyelesh orunlirini ziyaret qilghan shuningdek u kembeghel ahalilargha qarita “Téxnikaliq terbiyeleshni dawamlashturush” ni tekitligen.

Melumki, xelq'arada xitayning Uyghurlarni “Terbiyelesh merkezliri” namidiki yighiwélish orunlirigha qamighanliqi tenqid qiliniwatqan bolup, xitay hökümiti bu orunlarni “Téxnika terbiyelesh merkezliri” yaki “Mektepliri” dep chüshendürmekte.

Téxi yéqinda Uyghur aptonom rayonining re'isi shöhret zakirmu mexsus xoten wilayitidiki niye nahiyesi, qaraqash we chira nahiyelirini ziyaret qilghan we öymu-öy kirip déhqanlarni ziyaret qilip, oxshashla xotendiki namratliq mesilisini üzül-késil hel qilishni tekitligen idi.

Xoten wilayiti xitay hökümitining 2017-yilidin bashlap yolgha qoyghan lagér tüzümining eng éghir zerbisige uchrighan wilayetlerning biri. Xoten wilayitining özidila lagérgha kirip ketken adem sanining nechche yüz minggha yétidighanliqi mölcherlenmekte. Mushundaq bir shara'itta yuqiridiki bu ikki xitay yuqiri derijilik emeldarining arqa-arqilap xotenni ziyaret qilishi küchlük diqqet qozghimaqta.

Közetküchilerning perez qilishiche, nöwette xelq'arada b d t we herqaysi döletler hökümetlirining Uyghur élidiki lagérlargha qarita musteqil halda xalighan orunda tekshürüsh élip bérish heqqidiki telepliri qattiq kücheymektiken. Ular mushundaq bolghusi ziyaretler aldida lagér sirtidiki Uyghurlarning keng kölemlik naraziliqini peseytish, ularni iqtisadiy yardemler arqiliq melike qilishni meqset qiliwatqan bolushi mumkin iken.